GENERAL SANTOS CITY -- Kaso nga pagpatay ang isang-at batok sa mag-amahan nga giingong maoy mipatay sa pulis human madakpi alas 11:00 sa buntag, Martes, Mayo 27, 2025.
Giila ang mga suspek nga sila alyas Senior, 42-anyos, ug anak niini nga si alyas Junior, 25 anyos.
Ang biktima mao si Police Executive Master Sergeant (PEMS) Geoffrey Demorito Angub, 45 anyos, minyo ug nadestino sa Bagumbayan Municipal Police Station, ug nagpuyo sa Barangay Kalawag 2, Isulan, Sultan Kudarat Province.
Sumala kang Sultan Kudarat Police Provincial Office (SKPPO) Director Colonel Bernard Lao nga nag-uban nga naglakaw si Angub ug ang suspek nga si alyas Senior sa Peneza Street, Barangay Kalawag 2, Isulan alas 2:15 sa kaadlawon niadtong Mayo 27.
Apan sumala pa, nakadungog ang pipila ka molupyo sa dapit og buto sa armas ug wala madugay ilang nakita matud pa si alyas Junior nga niabot ug nipusil sab ngadto sa pulis sa makadaghang higayon.
Miikyas dayon ang mga suspek sakay sa Ford Raptor nga kolor blue, paingon sa Crossing Repolyo, Barangay Sulit, Polomolok, South Cotabato.
Nadala sa Sultan Kudarat Provincial Hospital si Angub apan nabugtoan sa kinabuhi.
Atol sa gilusad nga pursuit operation sa kapulisan, nadakpan ang mag-amahan diin nakuha sa ilang posisyon ang usa ka kalibre .45 nga pistola ug 9mm pistol.
Balhog na ang mga suspek sa prisohan ug naghuwat sa tukmang kaso nga ipasaka batok kanila sa korte. (Edgar E. Fuerzas)