
KASONG murder ang atubangon sa mag-inahan sa natigayong pagpanigbas sa Purok 9, Sitio Pag-ibig, Barangay Lumiad, Paquibato District, Davao City, Enero 14, 2025.
Kini ang gibutyag ni DCPO spokesperson Police Captain Hazel Tuazon human duha ka anggulo ang nanggawas nga bersiyon sa hitabo, apan kagahapon sa buntag, gipagula na sa DCPO ang tinuod nga hitabo subay sa imbestigasyon sa Homicide and Arson Section sa Paquibato PNP.
Sa maong hitabo, miresulta sa kamatayon ni Romeo Ebo Faciol diin ang patay’ng lawas niini gidala sa Rivera Funeral Homes alang sa autopsy.
Pinaagi sa paspas nga imbestigasyon sa hitabo, misangpot kini sa pagsurender sa suspek nga si Edwin pag-umangkon sa biktima nga si Romeo, 22-anyos, mag-uuma, ug residente sa dapit.
Suspek sab ang inahan ni Edwin nga si Felomina, alyas Gina (bayaw sa biktima nga si Romeo), 55-anyos.
Ang nakasaksi nga si alyas Rico, 22-anyos, nagbutyag nga mga alas 11 sa buntag niadtong Enero 14, 2025, gi-hire siya ni Eddie, amahan ni Edwin isip laborer/packer sa saging.
Human sa paniudto, nag-inom sila og tuba kauban sila si Eddie, Walito, Jason ug Edwin.
Mga alas 3:30 sa hapon sa samang petsa, ang biktima nga si Romeo nananom og lubi tupad sa umahan sa iyang igsuon nga si Eddie.
Niadtong tungora si Edwin hubog na, nakakita sa biktima, miduol kaniya, ug miatubang kaniya, nga nagsinggit “Magpatay ta, Pa (Romeo Faciol)!” Nahitabo ang init nga panaglalis nga misangpot sa layogay.
Ang inahan ni Edwin nga si Felomina, nagdala og sundang, diin giitsa niini ngadto sa iyang anak aron gamiton batok kang Romeo, apan, nakahigayon ang biktima sa pag-ilog sa sundang.
Si Eddie, ang amahan sa suspek, misuway sa pag-ulang sa away apan gitigbas sa biktima gamit ang sundang diin naigo sa wala nga abaga.
Dugang pa, si Edwin ug ang biktima nagligid-ligid sa ubos, ug ang biktima nawad-an sa iyang gunit sa sundang apan gikuha kini ni Felomina ug gitigbas kausa ang biktima nga naigo sa likod.
Si Edwin nikuha og mahait sab nga butang ug gidunggab sa dughan nga miresulta sa kamatayon sa biktima.
Sa pagkakaron, anaa na sa kustodiya sa kapulisan ang mga misurender nga suspek alang sa tukmang disposasyon ug pagpasaka og kasong murder ngadto sa korte. (Jeepy P. Compio)