PADAYONG nanubay ang mga otoridad diin usa sa gilantaw ang personal nga atraso isip motibo sa pagpusil sa mag-live-in partner ala 1 sa kadlawon, Abril 20, 2024, sa probinsiya sa Cotabato.
Namatay sa insidente si Mary Jane Quimot Macunan, 27-anyos, taga Barangay Upper, Bao Alamada, Cotabato.
Samtang padayong giatiman sa mga doktor ang kaipon niini nga si Anthony Siosam Mariano, 35, taga Barangay Poblacion 1, Midsayap, Cotabato.
Sa report nga giyagyag ni Midsayap Chief of Police Lieutenant Colonel John Miridel Calinga, samtang sakay sa motorsiklo ang mag-live-in partner ug naglatas sa Purok Chariza, Lapu-lapu Street, Barangay Poblacion 1, Midsayap, Cotabato, nahitabo ang duguon nga krimen.
Samtang duol na ang duha sa ilang boarding house, mipwesto sab dayun ang riding in tandem dayon pusil kanila.
Mikaratil sab og padagan sa ilang motor ang mga suspek, samtang mga silingan nga natugaw sa buto sa armas, daling misapupo sa mga biktima ug gidala sa ospital.
Patay diha-diha dayon si Macunan, samtang si Mariano giingong kritikal ang kahimtang. (Edgardo E. Fuerzas)