NAKAPLAGAN na ang patay nga lawas sa mag-uyab nga naligo sa busay nga naanod sa baha alas 2:20 sa hapon, Lunes, Mayo 19, 2025, sa Siyudad sa Koronadal.
Giila ang mga nakabsan sa kinabuhi nga sila Christian Pederiso, 28-anyos, shopee rider, ug Jessa Mae Huesca, 24-anyos, magtutudlo sa Mary Land School Inc. ug nagpuyo sa Barangay Paraiso, Koronadal City.
Sa taho gikan sa City Disaster Risk Reduction and Management Office (CDRRMO-Koronadal) nga naligo ang mga biktima sa Millinium Falls sa Barangay Cacub sa dakbayan.
Samtang nangaligo ang mga biktima, kalit nga nibundak ang kusog nga ulan ug nihaguros ang hangin.
Kalit matud pa nga nibaha ug wala na makalingkawas ang mga biktima ug gianod sa kusog nga bul-og sa tubig-baha.
Abtik nga nilusad og search and rescue operation ang CDRRMO, uban ang kapulisan ug mga opisyales sa Barangay Cacub.
Alas 5:45 sa hapon, nakaplagan ang patay nga lawas sa mga biktima sa sapa ubos lamang sa gikaligoan nila nga Millinium Falls.
Pasidaan sa mga awtoridad sa mga mangaligo sa busay nga mag-amping kanunay ilabi na nga ting-ulan karong panahona. (Edgar E. Fuerzas)