KIDAPAWAN CITY -- Nagbangutan ang pamilya sa magsuon nga namatay sa pagkalumos kon diin ang usa nakaplagan na alas 4:30 sa hapon, Dominggo, Hulyo 20, 2025, sa Kabacan, probinsiya sa Cotabato.
Una nga nakaplagan sa Kabacan River sa maong lungsod nga walay kinabuhi nga si Johayrin Saidona ug ang ikaduha nga si Jackelyn Saidona, 6-anyos, nga gisalom sa mga divers o mga abantero diin nakuha kini ni JayR Sangcala ilawom sa tubig sa USM River Park duol sa USM Amphitheater.
Kahinumdoman nga nangaligo ug nagdula ang mga biktima sa Kabacan River, duol lang sa ilang gipuy-an sa diha nga naanod sa sapa.
Nipadayag sa iyang pasalamat si Kabacan Cotabato Mayor Evangeline Pascua-Guzman sa tanang nitabang ug sa mga rescue volunteers nga naglakip sa Municipal Disaster Risk Reduction and Management (MDRRM-Kabacan), apil MDRRM-Carmen, Provincial DRRM-Cotabato, abanteros sa Brgy. Salapungan, Aringay, Bangilan, Poblacion, Banawag, Dagupan, ug uban pa.
Nagpasalamat usab siya kang Jayr Sangcala nga nitabang ug nisalom sa sapa ug nakit-an ang lawas sa nalumos nga bata.
Una nang nihatag si Mayor Guzman og financial assistance sa pamilya sa mga biktima ug gipaubos sa psychosocial intervention ang bata nga kauban sa mga nalumos.
Padayon nga nanawagan si Mayor Guzman ug Vice Mayor Herlo Guzman Jr. sa mga tawo nga batasanon ang pagbantay sa mga bata ilabi na sa mga nagpuyo duol sa sapa. (Edgar E. Fuerzas)