KASO nga kalapasan sa Republic Act 9165 o Comprehensive Dangerous Drug Act of 2002 ang gipasaka batok sa magtiayon nga namaligya og shabu alas 4:00 sa hapon, Huwebes, Mayo 16, 2024, sa Cotabato City.
Giila ang mga suspek nga sila alyas Acon ug iyang asawa nga si alyas Madam, mga molupyo sa Bongo Island, Parang, Maguindanao del Norte.
Sumala kang Agent Datu sa Philippine Drug Enforcement Agency-Bangsamoro Autonomous Region (PDEA-BAR) nga nagpahigayon sila og drug buy-bust operation sulod sa usa ka hotel sa Don Rufino Alonzo Street, Barangay Poblacion 5, Cotabato City.
Sa dihang gitunol na sa magtiayon ang shabu ngadto sa PDEA asset, gilayon silang gipangdakop.
Nakuha sa posisyon sa mga suspek ang tulo ka jumbo size ug upat ka gamay nga pakite sa shabu nga motimbang og 150 gramos.
Gawas sa druga, nakuha sab gikan sa magtiayon ang drug buy-bust money, mga drug paraphernalia ug mga personal nga kagamitan.
Kantidad og Php 1,088,000 ang nakompiska nga shabu sa mga suspek base sa drug market value.
Gibalhog ang magtiayon sa prisoihan sa PDEA-BAR samtang gihulat ang mando gikan sa hukmanan. (Edgar E. Fuerzas)