NAPASAKA na ang mga kasong qualified child trafficking, paglapas sa Republic Act 11930 kun Anti-Online Sexual Abuse or Exploitation of Children and Anti-Child Sexual Abuse or Exploitation Materials Act, ug Republic Act 7610 kun Special Protection of Children Against Abuse, Exploitation and Discrimination Act batok sa mag-asawa ug lain pang usa.
Niadtong Huwebes, Hunyo 5, 2025, gipresenta sa mga sakop sa media sa Davao City ang mag-asawa ug laing usa human nga sila napuhag sa elemento sa National Bureau of Investigation Southeastern Mindanao Regional Office (NBI-Sembro) Davao Region, NBI Manila Anti-Human Trafficking Division, Inter-Agency Council Against Trafficking (IACAT), non-government organizations, partners uban ang Department of Social Welfare and Development Office (DSWD) Davao Region.
Sumala ni NBI-Davao director Atty. Arcelito Albao nga kini ang pinakaunang natala nga giingong online sex trafficking sa Lupon, Davao Oriental niadtong Hunyo 3, 2025.
Nasayran nga mag-asawa nga nag-edad og 31-anyos ug 34-anyos ang nadakpan ug ang usa uyoan sa mga bata nga gihimong biktima nga nagpangedaron og 4-anyos, 7-anyos, 9-anyos ug 11-anyos, usa kanila giingong anak sa mag-asawa.
Giingon sa opisyal nga langyaw ang handler sa giingong online sex trafficking ug mismong ang balay sa mga suspek ang gihimong cybersex den bugti sa salapi.
Human nga nadawat sa awtoridad ang reklamo, gilayong gironda sa NBI-Davao ang nasampit nga balay ug nakumpiska ang mga s*x toy, mga tablets, cellphones, video camera, mga tripod, lights, earphones nga posibleng maoy gigamit sa cybersex.
Gilayong na-rescue ang mga menor de edad kinsa gipailawom sa medico check-up ug counseling sa Recovery and Reintegration Program for Trafficked Persons sa DSWD. (Jeepy P. Compio)