GIKOMPIRMA sa Department of Education–Davao City Division (DepEd-Davao City) nga 3,690 ka magtutudlo hingpit nang andam aron nga magserbi isip miyembro sa electoral board sa taliabot nga 2025 National and Local Elections (NLE).
Gisulti ni Reynante Solitario, DepEd-Davao City Superintendent, nga kinatibuk-ang 3,690 ka magtutudlo ang magserbi sa siyudad ug 1,060 kanila nakabotar na pinaagi sa absentee voting.
Dugang pa niini nga gawas sa mga magtutudlo, mga klasrom nga gitagana nga gamiton andam na sab. Unya dugang pa niini, ang multipurpose halls ang gamiton atol sa pag-ihap sa mga botos andam na sab.
Gikanayon ni Solitario nga sundon nila ang sama nga preparasyon sa Daniel R. Aguinaldo National High School (DRANHS), kon asa si Vice President Sara Duterte gilauman nga mobotar. Ang seguridad ug kaluwasan sa lugar dumalahon sa Philippine National Police (PNP) ug sa Armed Forces of the Philippines (AFP).
Samtang ang lingkuranan nga gigamit ni kanhi Presidente Rodrigo Duterte sa dihang nibotar kini di na i-displi. Sumala ni Solitario, kay ipreserba kini.
Gipahimug-atan ni Solitario nga way electoral board members nakadawat og bisan unsang hulga. Hinuon ang division office nimugna na og task force aron pagtubag sa bisan unsang potensiyal nga mga hulga ngadto sa mga magtutudlo, sa pakig-alayon uban ang DepEd regional office. Kini maghatag og higayon sa mga magtutudlo nga daling makataho sa bisan unsang mga hitabo. Ipakatag sab ang mga abogado aron sa paghatag og legal nga tabang ngadto sa mga magtutudlo kung gikinahanglan.
Hinuon, gitaho niini nga ang ihap sa mga magtutudlo nga maserbi sa 2025 NLE nikubos itandi sa niaging mga eleksiyon tungod sa pag-ubos sab sa ihap sa clustered precincts. Samtang daghan sab nga mga magtutudlo nagpanikad nga makaserbi, apan ang dibisyon di makaakomodar kanila, basi sa taho gikan sa Commission on Elections (Comelec). Apan positibo sila nga dugang mga magtutudlo makaapil atol sa Barangay and Sangguniang Kabataan Elections (BSKE) nga gitakda sa Disyembre.
Gibutyag ni Solitario nga kasagaran sa mga magtutudlo buot nga makaserbi tungod sa taas nga honorarium. Sumala sa Comelec Resolution No. 11076, Section 13, giulohan og “Entitlement of Honoraria, Allowances, Service Credits, and Other Benefits,” dunay pagtaas nga gibanabana nga P2,000 sa honorarium, uban ang napulo ka adlaw nga service credit.
“Daghan kaayo ug interested but we cannot accommodate them all,” padayag niya atol sa paghinabi sa mga tigbalita niadtong Biyernes, Mayo 2, 2025, sa DCPO grounds. (Rojean Grace G. Patumbon)