Malabog CDRRMO satellite office sugdan og tukod sa Hulyo

GISULTI sa City Disaster Risk Reduction and Management Office (CDRRMO) nga ang pagpabarog og satellite office sa Barangay Malabog sa Paquibato district gitakda nga sugdan sa tunga-tunga sa Hulyo 2025.

Si Rudy Encabo, Assistant Department Head sa CDRRMO, namahayag atol sa ISpeak media forum, Huwebes sa buntag, Marso 20, sa City Mayor’s Office (CMO), nga ang proyekto, nagtumong sa pagpalambo sa pagtubag sa emerhensiya, ilabi na alang sa mga molupyo nga nanimuyo sa hilit nga lugar sama sa Malabog, aron nga makahatagan gilayon sila og pag-atiman panahon sa emerhensiya.

Ang oras sa pagtubag sa emerhensiya mas paspas kung makatawag gilayon.

“So kung wala ang Malabog, dugay pa kayo mangabot ang uban pa natong asset didto sa assistance, well naa may atong assistance partnership from the barangay pero when it comes to 911 itself medyo dali siya kung naa tay satellite station sa Malabog,” tug-an niya.

Gipahimug-atan sab ni Encabo ang pagpalapad sa network sa mga satellite centers, uban ang mga naa na napahimutang sa Baganihan, Calinan, Toril ug Cabantian, ug giabangan nga pasilidad sa Panacan.

Kung matapos, ang Malabog center mao na ang ikalima nga permanenteng satellite nga gambalay sa siyudad, nga nagdugang og kalig-on sa disaster preparedness nga paningkamot sa Davao.

Gikanayon niya nga kung ang pagpalapad sa satellite station magpadayon sa Barangay Lasang, magpalambo kini ug maghatag og higayon sa first responders nga dali rang makaatiman sa mga insidente sa lugar.

Gitumong ang proyekto sa pagwagtang sa kalangay tungod sa grabeng traffic, nagsiguro sa mas paspas ug dali nga pagpakatag sa emergency teams.

Isahon ang inisyatibo sa Information and Communication Technology (ICT) aron nga pakusgon ang emergency coordination, samtang mga ambulansiya ug uban pa estrahikong ipahimutang aron nga makahatag og paspas nga tabang niadtong nanginahanglan.

Iyang gipahimug-atan sab nga kining kalamboan magpanindot pa sa kinatibuk-ang public safety emergency nga kaandam sa dakbayan.

Iyang gikompirma nga pito ka bag-ong ambulansiya nalakip sa badyet karong tuiga ubos sa disaster funds, nga magseguro sa paspas nga panahon sa pagtubag sa mga emerhensiya sa tibuok siyudad. (Jhayrene Hermoso/DOrSU intern)