Mananagat patay na nga nilutaw sa dagat

Mananagat patay na nga nilutaw sa dagat
Published on

DAVAO DEL NORTE -- Patay nang nilutaw ang mananagat nga giingong nalumos samtang nanagat sa dagat sa Barangay Balet, Babak District, Island Garden City of Samal.

Ang biktima giila nga si Renaldo Saug Balas, 27-anyos, ulitawo, ug molupyo sa nahisgutang dapit.

Subay sa report sa kapulisan, alas 5:30 sa hapon, Hunyo 30, 2025, ang igsuong babaye sa biktima nga ginganlan og Jinalyn, 36-anyos, call center agent nga taga Purok 6, Sitio Kila, Barangay Balet, Babak District nidangop sa IGACOS Police Station ug nitaho kabahin sa gidangatan sa biktima nga sa nahisgutang dapit.

Gibutyag nga sa pagkadawat sa maong taho, kapulisan sa IGACOS PNP gilayong niresponde sa gitumbok nga dapit aron sa pagsusi sa taho.

Base sa inisyal nga imbestigasyon ug subay sa pamahayag ni Jinmar, 29-anyos, kinsa igsuon sab sa biktima nga alas 3:00 sa hapon, Hunyo 29, 2025, nangisda sila sa biktima sa kadagatan sa Barangay Balet nga gibana-banang dunay gilawmon nga 50 ka tiil, uban sa tulo nila ka mga ig-agaw kung diin pagka-alas 4:00 sa hapon, nakahukom silang mamalik sa baybayon sanglit giingong nagkakusog na mga balud sa dagat.

Matud pa nga nakita ni Jinmar nga nisunod kanila si Renaldo apan wa madugay, paglabay sa pila ka mga gutlo, mao na la’y ilang nakita ang sakayan nga Boya nga naglutaw ug ang biktima wala na.

Sumala pa nga gilayong gipangita ang biktima og kapin duha ka oras, una napalgan dihang nilutaw na lang kini sa ibabaw sa tubig dagat.

Gipaningkamotan nga maluwas ang biktima apan giingong pakyas ang mga kaubanan sa pagsalbar sa iyang kinabuhi.

Sumala sa doktor nga nihiling kaniya nga namatay ang biktima tungod sa Cardiopulmonary Arrest Secondary to Drowning in Sea Water.

Gidala na ang patay nga lawas sa biktima sa ilang panimalay alang sa iyang paghaya. (Dexter T. Visitacion)

Trending

No stories found.

Just in

No stories found.

Branded Content

No stories found.

Videos

No stories found.
SunStar Publishing Inc.
www.sunstar.com.ph