HUMAN makaalagad og dul-an usa ka tuig isip direktor sa Davao City Police Office (DCPO), hingpit nang nikanaug si Colonel Hansel Marantan sa iyang katungdanan ug magsugod sa iyang bag-o ug mas masuktanong papel sa national headquarters sa Philippine National Police (PNP).
Si Marantan, kinsa nag-alagad isip DCPO chief sulod sa 11 ka bulan, nagkompirma niadtong Lunes, Hunyo 30, 2025, nga siya gibalhin ngadto sa Peace Process and Development Center (PPDC) sa Camp Crame.
Sa usa ka hamubo nga paghinabi buan ang mga tigbalita human sa turnover ceremony, gihulagway ni Marantan ang iyang bag-ong papel nga kritikal ug masuktanon.
Matud niya nga ang iyang katungdanan nagkinahanglan og direktang pagpakiglambigit uban sa nag-unang mga isyu sa nasudnong seguridad, apil ang paningkamot sa pagtubag sa mga isyu nga dunay kalambigitan sa armadong grupo sama sa Bangsamoro Islamic Freedom Fighters (BIFF) ug sa Abu Sayyaf Group.
Iyang gi-esplikar nga ang iyang trabaho sa PPDC magtutok sa pagsalmot sa peace-building processes ug makig-koordinar uban ang nagkadaiyang hingtungdan sa kagamhanan.
Gitug-an niya ang kalapad ug komplikado nga gidak-on sa buhatan, nagtawag sa iyang responsabilidad nga "deep and encompassing."
Sa dihang gipangutana bahin sa "rationale" luyo sa iyang pagbalhin, gipaambit ni Marantan nga si PNP Chief Nicolas Torre III nagtumbok sa panginahanglan og mga opisyal nga dunay field experience sa conflict areas aron nga makatabang sa pag-umol og peace initiatives.
Sumala ni Marantan, ang iyang labaw nagpahayag nga bisan tuod kung daghang mga opisyal naanad nang magtrabaho sa giyera, duna karoy panginahanglan og maayong pagsabot sa intrikasya sa peace-building.
Giangkon ni Marantan nga naa pa siya karon sa proseso sa hingpit nga pagsabot sa mando sa PPDC, pinaagi sa pag-ingon nga bisan human mabasa ang inisyal nga "briefings and communications" gikan sa buhatan, iya nang gipanglantawan nga ang tahas komplikado ug mahagiton.
Iya sab nga gitumbok nga usahay ang pakig-away mahimong kabahin sa proseso aron sa pag-angkon sa kalinaw, bisan tuod kung ang tumong mao ang paglikay sa kasamok kung mahimo lang.
Una nitapos, nagpadayag si Marantan og pagka-positibo, nga nagkanayon nga mas palabihon niya ang pagtutok sa pagsabot sa papel una mohimo og dugang saad.
Gawas sa paghangop sa propesyonal nga hagit, gibutyag niya ang mas personal nga rason luyo sa iyang pagbiya sa DCPO: seryusong "health concerns".
Sa taho sa SunStar, pormal siyang nihangyo nga hulipan gikan sa iyang katungdanan sa DCPO niadtong Hunyo 13 ug kasamtangang on leave aron nga hatagan og pagtagad ang iyang panginahanglang medikal. Iyang gibutyag nga nagpailawom siya og "total knee replacement, carrying 52 metal screws, and having a titanium spine conditions that classify him as a person with disability and that he just needs to rest." (David Ezra Francisquete)