GIBUTYAG sa opisyal sa provincial health sa Davao del Norte nga ang ihap sa maternal deaths sa probinsiya niubos gikan sa 12 sa 2020 ngadto sa unom sa 2024.
Gipahayag ni Dr. Josephine Parreñas, provincial health officer sa Davao del Norte, nga ang probinsiya nilampos sa pagpakubos sa maternal deaths.
Gikan sa 12 maternal deaths niadtong 2020, ang ihap nikubos ngadto sa 10 sa 2021, pito sa 2022, ug unom sa 2023 ug 2024.
“This downward trend reflects the effective implementation of maternal health interventions in the province following the national strategy for mortality ratio reduction,” butyag niya atol sa Health Connect: Pag Healthy is Mommy, Protektado si Baby, Huwebes, Mayo 29, 2025.
Gipadayag ni Parreñas nga nagtutok sila sa nag-unang timailhan sama sa: pagtaas sa Antenatal Care (ANC) coverage gikan 79.8 porsiyento sa 2023 ngadto sa 81.8 porsiyento sa 2024, ang pagtaas sa Facility-Based Deliveries (FBD) gikan sa 93.4 porsiyento sa 2023 ngadto sa 96.7 porsiyento sa 2024, ang pagsaka sa postnatal care coverage gikan sa 94.24 porsiyento sa 2023 ngadto sa 96.5 porsiyento sa 2024, ang pagsaka sab sa mga gipanganak nga giatiman sa Skilled Health Professionals (SHP) gikan sa 95.5 porsiyento sa 2023 ngadto sa 96.8 porsiyento sa 2024, ug pagkubos sa wa matubag nga panginahanglan alang sa Family Planning (FP).
Ang ilang paningkamot nga makubsan ang maternal deaths nahisubay sa nasudnong tumong sa pagpakubos sa maternal mortality gikan 90 namatay matag 100,000 ka pagpanganak niadtong 2022 ngadto sa 70 sa 2030.
Samtang ang infant mortality rate matag 1,000 live births sa probinsiya naa sa 8.68 sa 2020, 13.5 sa 2021, 12.37 sa 2022, 8.7 sa 2023, ug 10.83 sa 2024. Gitin-aw niya nga ang peak sa 2021 tungod sa Covid-19 pandemic, ug bisan kon ang gidaghanon nikubos, padayon ang probinsiya nga nakasinati og "fluctuations."
Apan kompiyansa siya nga ang ihap magpabilin nga ubos sa national target nga 15.
Gitampo ni Parreñas ang pagkubos sa maternal deaths ug infant mortality sa ilang health referral system, ang matag kuwarter nga pagsusi sa maternal death nga gihimo uban ang OB-GYN consultants gikan sa Davao Regional Medical Center ug Southern Philippines Medical Center, ug uban pang interbensiyon.
Kini naglakip sa bi-annual consultative nga tigum uban sa pribado ug publikong pasilidad sa paanakan, maternal health forums nga nakabase sa barangay, social media campaigns, probisyon sa welfare goods to encourage ANC visits, ug ilang Provincial Buntis Congress.
Ubang inisyatibo naglakip sa pagtutok sa ANC training alang sa health workers, probisyon sa essential medicines and logistics, coaching and mentoring sa pribado ug publikong pasilidad sa paanakan, ug scheduling scheme alang sa healthcare workers nga mohimo og ANC visits.
Ang probinsya dunay projected population nga 1,166,096 ug kinatibuk-ang 15,487 live births. (Rojean Grace G. Patumbon)