LABIHAN ang kalipay sa mga molupyo sa usa ka barangay sa gidalit nga programa sa kapulisan sa Mawab Municipal Police Station (MPS) partikularmente sa Barangay Saosao, buntag niadtong Hunyo 7, 2024.
Sa maong kalihukan gipakita sa kapulisan sa Mawab MPS ang pakighigala o pakighimamat sa komunidad pinaagi sa mascot nga ginganlan og Sgt. Maw-ab nga nakahatag og kalipay ug positibong pagbati sa kasingkasing sa matag molupyo.
Matud pa nga ang maong aktibidad malampusong napahigayon, ubos sa pamunoan ni Police Major Marion R. Sibayan, Chief of Police sa Mawab MPS, uban ang suporta sa Revitalized Pulis sa Barangay (R-PSB) Cluster 7, pinangulohan ni Police Master Sergeant Melvin Millan kinsa mipadayag og hugot nga suporta sa relasyon tali sa komunidad.
Sumala pa nga ang maong programa suportado sab sa lokal nga panggamhanan sa lungsod sa Mawab nga gidumala ni Mayor Ruperto Gonzaga III ug Barangay Kapitan Alijandro Dug-oy.
Nagkadaiyang serbisyo ang gidalit sa maong aktibidad nga natagamtaman sa mga molupyo sa Barangay Sao sama na lang sa libreng gupit, palugaw ug uban pa kung diin ang pinakauyokan mao ang inisyatibo sa maayong panglawas nga gipangulohan ni Dr. Cynthia Amoguis, MD gikan sa opisina sa Municipal Health Office nga naglangkob sa libreng tuli ug dental outreach.
Dugang gibutyag nga pinaagi sa mascot nga si Sgt. Maw-ab napakita ngadto sa katawhan nga ang pagpanerbisyo sa mga kapulisan dili lang ang pagmentinar sa kalinaw ug kahapsay sa katilingban, apil na sab ang paghatag og kalipay ngadto sa komunidad. (Dexter T. Visitacion)