GIBUTYAG ni Davao City Mayor Sebastian “Baste” Duterte nga dili siya makapili sa sunod nga direktor sa Davao City Police Office (DCPO) tungod sa politika, human nga gipahibalo ni Police Colonel Hansel Maratan nga pormal na niyang biyaan ang iyang katungdanan isip director sa DCPO.
“That’s impossible, they would never allow it, kung maalala nyo [if you can remember] last year, they changed three city directors in two days without my consultation and under the law, the city mayor should be allowed to choose kung sino yung [who will be] city director,” tug-an niya sa paghinabi kaniya sa mga tigbalita, Martes, Hunyo 18, 2025.
Matud ni Duterte nga bisan kung nahiunod sa balaod, siya nga mopili alang sa city director “probably that won’t happen.” Dugang pa niya nga ang hinungdan luyo niini mao ang politika ug ang administrasyon ni President Ferdinand “Bongbong” Marcos Jr. kontra nila.
Ubos sa Republic Act (RA) No. 8551, labing nailhan isip Philippine National Police Reform and Reorganization Act of 1998, ang city mayor ug municipal mayor gihatagan og gahum nga mopili og city o municipal police director gikan sa listahan sa lima ka eligible candidates nga girekomenda sa police regional director.
Ang Section 64 sa RA 8551 nagkanayon nga ang city mayors, human mapili sa eleksiyon, awtomatik nga ma-deputized isip representante sa Philippine National Police commission sa ilang tagsa-tagsa ka hurisdiksiyon.
Sayo niini nga adlaw, nag-abiso si Marantan sa 20th City Council ug nagkompirma ngadto sa mga tigbalita atol sa paghinabi nga pormal siyang nihangyo nga moluwat sa iyang katungdanan tungod sa seryusong health concerns. Iyang gibutyag nga magrekomenda siya og tulo ka mga mosunod kaniya; apan, wala niya gibutyag ang mga pangalan niini. Unya gisulti ni Duterte nga di siya molaum nga makapili og city director gikan sa tulo ka mga mohulip nga gibutyag ni Marantan ug wala gani siya makakita sa listahan.
Hinuon, matud sa mayor nga samtang si Marantan ang gitudlo isip city director "he did okay” ug iyang gihimo ang tanan sa iyang gahum nga mahimong makiangayon. Busa nanghinaut siya kaayohan ni Marantan sa iyang karera ug "more power to him".
Si Marantan, kinsa natudlo niadtong Hulyo 10, 2024, mao ang ikalima nga DCPO director sukad Marso 2024. Ang iyang pagkatudlo nasundan og yagaw nga panahon sa sunod-sunod nga "leadership turnover."
Sa maong adlaw sa iyang pagkatudlo lang, tulo ka mga colonels nagpuli-puli sa paghupot sa katungdanan sa DCPO sulod lang sa pipila ka oras.
Si Police Colonel Lito Patay maoy unang na-instolar, unya gitangtang human ang command conference.
Si Police Colonel Sherwin Butil maoy nihulip apan gitangtang sab human ang tulo ka oras lang.
Unya si Marantan, gikan sa National Capital Region, maoy gitudlo ni kanhi PNP Chief General Rommel Marbil. (Rojean Grace G. Patumbon)