ISIP tubag sa bag-ohay nga mga kaso sa Monkeypox sa Davao Region, gipasalig sa Department of Trade and Industry-Davao Region (DTI-Davao) ngadto sa publiko nga andam sila sa pagtubag sa kabalaka sa mga konsumante, ilabi na gyud kabahin sa pagpanago ug pagpamahal sa medical supplies sama sa face masks ug alcohol.
Gipahayag ni Acting Assistant Regional Director Rachel Remitio atol sa Business Forum Matters, Biyernes, Mayo 30, 2025, sa Hukad, Abreeza Mall nga ang ahensiya nagpadayon sa ilang pagmonitor isip kabahin sa Inter-Agency Task Force (IATF) on Emerging Infectious Diseases, nagpabug-at sa ilang krusiyal nga papel sa pagpahiuyon ug pagsuporta sa mga patigayon, ilabi na sa mga mamaligyaay ug narehistrong mga establisemento.
Gipahimug-atan ni Remitio nga samtang ang DTI makalihok sa mga reklamo sa konsumante sulod sa iyang hurisdiksiyon, ilang i-endorso ang mga reklamo ngadto sa haum nga mga ahensiya kung gikinahanglan.
Pananglitan, bahin sa isyu sa presyo nga dunay kabahin sa medical nga mga gamit mahimong idangop kini sa Philippine National Police (PNP), samtang mga reklamo nga dunay kalambigitan sa kalidad sa produkto mahulog ilawom sa Food and Drug Administration (FDA) ug sa Department of Health (DOH).
"We will handle the concerns of the consumers, but if it is outside our jurisdiction, we will automatically endorse it to the right agency," pahayag niya. Iyang gipasidan-an sab ang mga namaligya nga likayan ang pagpahimulos sa kahimtang sa pagpamahal sa mga esensiyal nga baligya, nag-awhag sa mga patigayon nga mahimong responsable ug manggiangayon.
Ang kabalaka sa publiko mipatim-aw human ang mga videos ug hulagway nga nagkatag sa online sa giingong pag-panic buying, kon diin mga tawo nagsalimoang sa pagpamalit og suplay taliwala sa kahadlok sa inpeksiyon.
Sukad sa pagsulat, wala pa makadawat ang DTI-Davao og bisan unsang pormal nga mga reklamo apan nagpadayag og kaandam nga makig-koordinar uban ang mga konsumante ug ubang mga ahensiya aron nga mapakgang ang bisan unsang iregularidad.
Padayon ang DTI’s Fair Trade Enforcement Bureau (FTEB) sa pagpaniid sa pagpamaligya og mga butang ug serbisyo aron nga maseguro nga nagtuman ang patigayon sa balaod ug sumbanan, ilabi na kadtong dunay kalambigitan sa kaluwasan ug kalidad sa mga produkto.
Samtang ang Southern Philippines Medical Center (SPMC) sa Davao City kasamtangan nga nagtambal sa tulo ka gikompirma nga pasyente sa mpox.
Sumala kang Dr. Ricardo Audan, medical center chief sa ospital, pito ang gisuspetsahang kaso ang nasulod, kon diin ang tulo nagsusi nga positibo basi sa mga resulta gikan sa Research Institute for Tropical Medicine (RITM).
Dugang mga sampol ang gikolekta gikan sa nahabiling mga gisuspetsahan nga pasyente alang sa dugang pagsusi.
Gitin-aw ni Audan nga ang Mpox gikonsidera nga "mild viral infection" ug di mokuyanap nga paspas sama sa Covid-19.
Ang SPMC nagpahimutang na og 20 isolation beds ilabi na alang sa mga pasyente sa mpox. Gitaho sa Davao City nga dunay unom nga nakompirma nga kaso sa mpox sa niaging duha ka bulan sukad Mayo 30, 2025.
Sa Davao de Oro, nagkompirma sab ang Provincial Epidemiology and Surveillance Unit (Pesu) og tulo ka kasong mpox sukad Mayo 28.
Gitaho sa mga awtoridad sa panglawas nga duha ka pasyente nakarekober na, samtang ang usa nagpabilin nga gisuspetsahan nga kaso ubos sa higpit nga obserbasyon.
Sa Maco, usa gikompirma nga pasyente kinsa nakarekober na sab, ug laing indibiduwal gimonitor sab.
Sa Nabunturan, gibantayan og maayo sa health workers ang gisuspetsahan nga kaso. Tanang mga naapektuhan nga indibiduwal ug ang ilang close contacts kasamtangan karong gilain samtang padayon ang pagpaniid.
Kasamtangan, mga awtoridad gikan sa medical ug government sectors nag-awhag sa publiko nga magpabiling kalmado, likayan ang pag-panic buying, ug itaho ang nagpahimulos nga mga negusyante ngadto sa tukmang mga ahensiya sa gobyerno. (David Ezra Francisquete)