GIPAHIBALO sa usa ka opisyal gikan sa City Government of Davao nga ang Davao City Interim Bus Service gilauman nga magsugod na sa operasyon sa dakbayan karong Oktubre 2025.
Gibutyag ni Abogado Tristan Dwight Domingo, acting city administrator ug Davao City Bus Project manager, nga tinguha nila nga modagan na ang mga bus sa di madugay, human sa direktiba gikan ni acting Davao City Mayor Sebastian “Baste” Duterte tungod sa nagkayamukat nang paghuot sa trapiko sa dakbayan.
“Siguro early end of September or October mapadagan na gyud tung napulo ka bus,” pasalig niya sa pakighinabi uban ang Davao City Disaster Radio (DCDCR), Huwebes, Hulyo 17, 2025.
Dugang pa niya nga base sa ilang pagmonitor, ang bag-ong mga bus gilauman nga ipadala nganhi sa siyudad sa Agosto o Septyembre karong tuiga. Naglaum sab siya nga nianang panahona, mga TESDA-certified drivers maanad na sa mga yunit.
Matud ni Domingo nga ang mga bus modagan lang panahon sa "peak hours", kay mao kini ang eskedyul nga gi-aplayan uban ang Land Transportation Franchising and Regulatory Board (LTFRB), base sa hangyo ug pagtuon nga nagpakita nga ang kadaghanang mga pasahero manakay og Public Utility Jeepneys (PUJs) sa maong mga panahon. Laing hinungdan alang sa paglimita sa mga oras sa serbisyo sa bus aron nga malikayan ang kompetisya uban ang mga drayber sa PUJs.
Kung ang pagserbisyo sa interim bus mahimong operasyonal, ang Peak Hours Augmentation Bus Service (PHABS), nga maoy temporary measure aron sa pagpaluag sa traffic congestion, magpadayon sa pagdagan. Ang PHABS ug ang interim bus service dungan nga magdagan aron sa pag-abag sa sumasakay.
Gipahimug-atan ni Domingo nga ang interim service mao ang city-led initiative, kay ang hingpit nga pagpaimplementar sa Davao Bus Project molanat pa og dugay nga panahon. Hinuon ang paningkamot ni Duterte, ang siyudad nakahimo na og palit sa maong mga bus aron nga suportahan ang matag adlaw nga pagpanakay sa Dabawenyos, ilabi atol sa mga peak hours.
Iyang gipaklaro nga bisan tuod kung ang proyekto gitumong sa pagpaluag sa mga dalan sa siyudad panahon sa rush hours, di kini maoy permanente nga solusyon sa suliran sa trapiko sa Davao.
Sumala kang Domingo, ang full-scale Davao Bus Project nga maglambigit og pagpamalit og mga 1,000 ka mga bus aron nga ihulip sa PUJs, gilauman nga maoy makapalambo og dako sa public transport sa dakbayan.
Kahinumdoman, gihimo ang ceremonial contract signing tali sa lokal nga panggamhanan ug AutoKID Truck Solutions niadtong Abril 21 alang sa pagpalit sa napulo ka Yutong ZK6126HG ka mga bus. Kini nga ubos og salog nga mga bus sa siyudad kabahin sa DC Bus Interim Service "feature modern amenities" ug makaakomodra og mga 40 ka mga pasahero nga maglingkod, uban ang dugang espasyo alang sa motindog nga komyuter. (Rojean Grace G. Patumbon)