MAG-ABAGA na sab ang mga drayber niining pagsaka sa presyo sa lana karong semanaha tungod kay ang mga kompaniya sa petrolyo nagpatuman og dinagko nga pagtaas sa presyo niini sa gasolina, krudo, ug kerosene.
Ang dagkong kompaniya sa gasolina sama sa Pilipinas Shell, Caltex, Seaoil, Cleanfuel, ug Petron, nipahibawo sa kinatibuk-ang usbaw nga P3.50 matag litro sa gasolina, P5.20 sa matag litro sa krudo, ug P4.80 sa kada litro sa kerosene.
Epektibo ang unang tagi nga pagsaka kagahapon, Martes, Hunyo 24, 2025, sugod alas 6:00 sa buntag nga adunay usbaw nga P1.75 matag litro sa gasolina, P2.60 matag litro sa krudo, ug P2.40 matag litro sa kerosene.
Ang ikaduhang tagi nga pagsaka sa presyo niini gitakda ugmang adlawa, Huwebes, Hunyo 26, 2025, diin ang nahabilin nga pagtaas sa presyo hutdon na og patuman.
Tungod niini, si Roberto Laraga, 40-anyos, drayber sa public utility jeepney (PUJ), nipadayag sa iyang pagkadismaya ug walay paglaum sunod-sunod nga pagsaka sa presyo sa produktong petrolyo nga nagpadayag sa resulta sa ilang mga kahimtang sa mga higayon nga sama niini.
“Wa tay mahimo ana kay mao na man ang giingon nila. Agwanta na lang ta ani. Bawasan na pud tawon among income taga adlaw,” ingon ni Laraga.
Usa sab ka kauban nga PUJ driver nga si Raymond, 48-anyos, miingon nga luoy sila kay sila ang unang maigo sa pagsaka sa presyo sa lana.
“Kada magtaas kami gyud una maigo. Pero nabalaka gihapon ko, kay kada adlaw, gamay na lang ang nabilin sa among kita,” ingon ni Raymond.
Ang ubang mga drayber sama sa 54-anyos nga si Edgar Baclay naghisgot sa daw kakuwang sa suporta nga madawat sa mga PUJ drivers, nga nagpalig-on pa sa band-aid solution nga reyalidad nga gihatag kanila.
“Wa na ta'y mahimo. Sunod na lang gyud ta. May lang unta og naay mohatag og subsidy,” butyag ni Baclay.
Aron masagubang ang pagsaka sa presyo sa mga produktong petrolyo, ang ubang mga drayber kinahanglang mag-adjust sa ilang inadlaw-adlaw nga pagpamasada.
Gipaambit sab sa nahiunang drayber nga nahinabi sa Superbalita nga kung giunsa niya makabiyahe og sayo pa sa kaadlawon ug sa samang higayon lugwayan sab niya ang oras nga mobiyahe sa gabii aron nga makaginansiya.
Gibutyag usab niya nga nitaas na ang iyang gasto sa gasolina, bisan sa wala pa mapatuman kining pagsaka sa presyo sa lana kagahapon.
“Sa pagkakaron, moabot ko og P800 ang tubil sa usa ka adlaw. Karon kay mosaka, mosobra na gyud na libo ang tubil kada adlaw,” ingon pa niya.
Nunot sa gipagawas nga pahibalo sa pagsaka sa presyo sa lana, ang Land Transportation Franchising and Regulatory Board (LTFRB) wa pa mohatag og updated fare adjustments sa PUJ ug PUV. (Glae Ann Richardson, SPAMAST Intern ug Shema Kailah B. Sacman, AdDU Intern)