PADAYON nga gisubay sa mga awtoridad ang nahitabong pangrapido sa mga sakop sa Barangay Peacekeeping Action Team (BPAT) alas 4:10 sa hapon, Dominggo, Mayo 18, 2025, sa Shariff Aguak, Maguindanao del Sur.
Atol sa hitabo namatay si Jordan Balayman Nacio, 30-anyos, minyo, samtang naangol sab sila Hamid Samsamin ug Abdulhadie Kamal Haji Iskak.
Gibutyag ni Maguindanao del Police Provincial Office (MDSPPO) Director, Police Colonel Ryan Bobby Paloma nga nakaparada ang gisakyan sa mga biktima duol sa NPS gas station sa Barangay Mother Poblacion, Shariff Aguak ug nag-istoryahay samtang dunay gihulat.
Apan kalit lang niabot ang usa ka mini-van ug gipamusil ang mga biktima gamit ang M16 armalite rifles kinsa mga suspek daling nisibat paingon sa SPMS Box sa Mamasapano sa nahisgutang probinsiya.
Mga naangol daling gisapupo sa mga nagresponde nga mga pulis ug gidala ngadto sa Maguindanao Provincial Hospital apan si Nacio namatay.
Nagtuo si Shariff Aguak Municipal Councilor Oping Ampatuan nga ang nahitabo mao ang resulta sa dumot sa mga sakop sa BPAT ug mga armadong grupo nga misamot gumikan sa away sa politika sa ilang mga agalon. (Edgar E. Fuerzas)