COTABATO CITY -- Gipalig-on pa karon sa Joint Task Force Central ang paglutos sa mga terorista nga ilang na-engkuwentro ala 1 a.m., Lunes, Hunyo 23, 2025, sa Mamasapano, Maguindanao del Sur.
Sa maong engkuwentro, duha ka mga terorista ang napatay nga sila Tahir Salim Suweb, 41-anyos nga nagpuyo sa Barangay Baka, Datu Odin Sinsuat, Maguindanao del Norte ug Benladin Adi Kamid, 23-anyos, molupyo sa Barangay Macasampen, Guindulungan, Maguindanao del Sur.
Nadakpan sab nga nasamdan nga sila Junjun Kayogen Leosen, 37-anyos, taga Barangay Salbu, Datu Saudi Ampatuan, Maguindanao del Sur ug Rasul Mendoza Kariman, 31-anyos, molupyo sa Barangay Bagan, Guindulungan, Maguindanao del Sur nga pulos mga miyembro sa Dawlah Islamiyah Hassan Group.
Sumala ni 6th Infantry (Kampilan) Division Chief ug Joint Task Force Central Commander Major General Donald Gumiran nga nilusad og decisive military operations ang puwersa sa 601st Brigade nga gilangkuban sa 6th Infantry Battalion ug 33rd Infantry Battalion batok sa mga terorista sa Barangay Libutan, Mamasapano nga nilungtad og 45 minutos una niatras ang mga terorista.
Narekober gikan sa encounter site ang duha ka M16A1 rifles, usa ka kalibre .45 nga pistola, mga sangkap sa paghimo og improvised explosive device (IED), unexploded ordnance (UXO), nagkadaiyang cellphone, Bushnell monocular scope, guba nga bipod, communication equipment, ug usa ka babayeng clutch bag nga adunay mga peke nga IDs.
Nunot niini, si Brigadier General Edgar L. Catu, Commander sa 601st Infantry Brigade nimando sa iyang mga sakop nga hingusgan pa ang paggukod sa ubang mga sakop sa maong grupo nga miikyas gikan sa nahitaboan sa engkuwentro. (Edgar E. Fuerzas)