SULTAN KUDARAT - Pusgay ang usa ka sakop sa Moro Islamic Liberation Front (MILF) nga misukol sa mga pulis sa anti-drug operation alas 6:20 sa gabii, Miyerkules, Pebrero 14 sa probinsiya sa Sultan Kudarat.
Giila ang napatay nga si alyas Abdul, 30-anyos, minyo ug nagpuyo sa Barangay Poblacion, Ampatuan, Maguindanao del Sur.
Matud ni Esperanza Chief of Police Major Alex De Pedro nga nagpahigayon sila og drug buy-bust operation sa Purok Bagong Silang, Barangay Salabaca, Esperanza, Sultan Kudarat.
Apan nakamatikod si Abdul nga mga pulis ang iyang ka-transaksiyon hinungdan nga mihulbot kini sa armas ug nagpabuto sa mga awtoridad.
Mibalos ang mga pulis ug pagpabuto hinungdan nga napatay niini ang suspek.
Narekober sa posisyon ni Abdul ang usa ka kalibre .45 nga pistola, duha ka magasin, mga bala ug 13 ka pakite sa shabu nga nagkantidad og P170,000 base sa drug market value.
Sa kasamtangan gipalig-on pa sa Esperanza PNP ang ilang kampanya batok sa ilegal nga druga.