Mipatay sa bise mayor nailhan na

AWAY sa yuta ang gilantaw nga motibo sa mga awtoridad pagpamanhig-patay kang Bise Mayor Roldan Benito sa South Upi, Maguindanao del Sur alas 4:10 sa hapon niadtong Biyernes, Agosto 2, 2024.

Kini mismo ang gibutyag ni Maguindanao del Sur Police Provincial Office Director Colonel Roel Sermese.

Giingong usa si Benito nga nakigbatok sa pagpanalipod sa ilang ancestral domain gikan sa matud pa Moro armed groups nga buot moilog niini gikan sa mga lumad sa South Upi.

Gikompirma ni Sermese nga natumbok na nila ang mga armadong grupo nga namanhig patay sa bise mayor.

Gawas kang South Upi Mayor Renalbert Insular, gikondena sab sa mga lideres sa mga lumad ug Bangsamoro Government ang pagpatay kang Benito.

Gimugna na sab sa Departmennt of Interior and Local Government (DILG XII) ug kapulisan ang Special Task Force nga maoy motutok sa imbestigasyon sa maong hitabo.

Kahinumdoman nga gawas kang Benito, patay sab ang iyang security escort nga si Weng Ramos samtang angol sab ang asawa ug anak sa bise mayor. (EEF)