NAMATAY ang asawa sa barangay kapitan sa Barangay New Opon, Magsaysay, Davao del Sur human nga giitsahan og granada ang elf truck nga iyang gisakyan alas 6 sa gabii, Miyerkules, Abril 24, 2024 sa Purok Pantukan 1, Barangay Jose P. Laurel, Panabo City.
Giila sa Panabo Police Station ang biktima nga si Loreta Saga Abapo, 56-anyos, taga Purok 2, Barangay New Opon, Magsaysay.
Nasayran nga ang biktima nakaangkon og daghan ug grabe nga samad sa kalawasan human niini nasalo ang granada nga giitsa ngadto kanila.
Nadala pa ang biktima sa Carmen District Hospital apan wa na matabang pa ug namatay.
Samdan sad ang anak sa biktima nga nga si Yushehito Abapo, driver sa truck, ug nagpabiling anaa sa ospital.
Subay sa report, duha ka lalaki nga sakay sa motorsiklo ang naglabay sa granada sa sulod sa truck nga daling mibusikad.
Usa ka lawom nga imbestigasyon ang gihimo karon sa Panabo Police Station aron maila ang mga suspetsado.
Sa hitabo, wala giwala sa kapulisan sa Panabo ang personal nga motibo sa kremin, diin usa-usa pa nilang gipangtigom ang mga butang nga makatabang ilang imbestigasyon. (Jeepy P. Compio)