NAGPADAYAG og kabalaka si Konsehala Luna Acosta sa dakbayan sa Davao bahin sa giingong mga indibiduwal sayop nga nangangkon nga dunay espisipiko nga matang sa closed circuit television (CCTV) nga kinahanglan alang sa mga establisemento, busa giawhag ang publiko nga magpabiling mabinantayon batok niining matang sa “modus.”
Si Acosta, kinsa maoy tsirman sa Committee on Peace and Public Safety, nagsulti nga ang iyang buhatan nakadawat og taho gikan sa Public Safety and Security Office (PSSO) nga nagkanayon nga daghang "unscrupulous individuals" nagtarget sa mga patigayon nga mosulay og tuman sa maong ordinansa.
"These individuals reporting to be members of the Davao City Police or from the Davao Police Auxiliary claiming that the ordinance requires a specific brand of CCTV to be installed and that they are selling the same," butyag niya atol sa iyang pagpamulong, Martes sa buntag, Mayo 6, 2025, sa Sangguniang Panlungsod.
Dugang pa niya nga ang DCPO ug ang departamento sa auxiliary nihimakak sa bisan unsang kalambigitan sa ilang mga sakop, ug nagtin-aw nga ang ilang buhatan dili direktang nag-implementar sa ordinansa.
Iyang gipahimug-atan nga wala sila molusad og operasyon may kabahin sa CCTVs.
Gitin-aw ni Acosta nga ang giamendahan nga ordinansa sa CCTV wala magmando og specific brand o model sa CCTV.
Gikinahanglan lang niini ang minimum technical specifications nga kinahanglan nga maoy tumanon sa mga establisemento.
Ang maong mga espesipikasyon mahimong matuman pinaagi sa paggamit sa walo ka mga nailang matang ug kapin sa 20 ka specific CCTV units.
Gipahayag niya nga mga patigayon libre nga makapili sa ilang brand ug unit nga ilang buot nga iinstolar sa ilang mga establisemento.
Subling gikanayon niini nga ang LGU, PSSO, ug DCPO di gyud mo-"require" sa mga patigayon nga mopalit og partikular nga brand o model, o morekomenda ba kaha og bisan unsang espisipiko nga suplayer.
Giawhag niini kung dunay moduol sa tag-iya sa patigayon o establisemento nga nagpaaron-ingnon, kinahanglan nga kuhaon ang ilang pangalan ug hulagway ug itaho gilayon ngadto sa DCPO, PSSO, o pinaagi sa Davao City Reports.
Gisugdan sa City Government of Davao ang pag-implementar sa giusab nga CCTV Ordinance niadtong 2024.
Padayon nga gisusi sa mga awtoridad ang mga establisemento sa siyudad aron nga maseguro nga mituman kini sa ordinansa.
Kahinumdoman, nga ang Amended CCTV Ordinance of Davao City giaprobahan sa ikatulo ug katapusang pagbasa niadtong Nobyembre 21, 2023.
Ubos sa ordinansa, mga CCTV cameras kinahanglan nga iinstolar sa mga hawan nga lugar nga way blind spots, pagseguro sa maximum coverage sa entrada, lapsanan, ug mga lugar sa himuong mga transaksiyon. (Rojean Grace G. Patumbon)