BULAG-BALIK, suma pa, ang sitwasiyon sa relasyon sa babaye ug lalaki kinsa patay nang napalgan sud sa lawak sa ilang giabangan nga boarding house sa Del Pilar Street, Jerome Extension, Barangay Rafael Castillo, Agdao District, Davao City.
Mayo 13, 2025 napalgan sud sa lawak ang patay’ng lawas sa duha ka indibiduwal nga giingong makarelasyon nga dunay pinusilan sa ulo nga naglunang sa dugo.
Sumala ni Davao City Police Office (DCPO) spokesperson Police Captain Hazel Tuazon nga manag-uyab ang duha ka indibiduwal diin giingong giuna'g patay sa lalaki ang babaye ayha kini nagpakamatay gamit ang pusil nga alegasyong iya sa kompaniya nga gitrabahoan sa babaye.
Kagahapon sa buntag, Mayo 14, 2025, ang pamilya sa lalaki mipatim-aw sa Angel Funeral Homes aron kuhaon ang patay’ng lawas sa ilang kabanay.
Nasayran nga bulag-balik ang relasyon sa duha apan padayon pa nga ginalantaw sa kapulisan ang tanang anggulo sa imbestigasyon aron masuta ang tinuod nga motibo sa krimen.
Nasayran nga ang babaye nga biktima usa ka alyas Marie nagpangedaron og 23-30 anyos, usa ka security guard ug residente sa Purok Mabuhay, Barangay Mabini, Koronadal City, South Cotabato Province kinsa dunay samad-pinusilan sa ulo samtang ang lalaki napalgang patay ug nakadat-ug sa babaye human nakahiagom sab og samad-pinusilan sa tuo nga bahin sa ulo.
Dugang nasayran nga nabalaka ang usa ka nag-abang sab sa maong boarding house human nga iyang nakita ang duha ka bangag sa bungbong rason nga gitaho kini ngadto sa tag-iya sa boarding house.
Didto nasuta nga adunay nagbuy-od nga tawo rason nga nagpakitabang gilayon sila sa kapulisan ug mga taga barangay.
Sa pasiunang taho sa DCPO subay sa kuha sa closed circuit television (CCTV) camera, nakita nga bandang 3:19 sa kaadlawon misulod ang babaye sa maong boarding house ug bandang alas 3:37 nakita sab ang presensiya sa lalaki nga misulod sa balay pagka- alas 3:38 sa kaadlawon.
Nakita pa nga migawas ang lalaki alas 3:40 ug misulod pagbalik human sa usa ka minuto ug dayong nadungog ang buto sa pusil.
Narekober sa crime scene ang usa ka 9mm caliber pistol, 2 ka magazine, 2 ka fired spent cartridge cases, 2 ka cellphones ug usa ka motor nga adunay plate number nga L867CY.
Sa pagsuwat, padayong ginapanubayan sa kapulisan ang panghitabo samtang ang patay nga lawas sa babaye naa karon sa Angel Funeral Parlor samtang ang sa lalaki nakuha na sa iyang mga kabanay. (Jeepy P. Compio)