DAVAO DEL NORTE -- Drayber sa nipaharurot og padagan sa gimaneho niyang motorsiklo wala makakontrol og nilahos ug nibangga sa gikasugat nga sakyanan hinungdan sa pagkamatay niini.
Nahitabo ang insidente alas 2:40 sa hapon niadtong Oktubre 27, 2024, sa Barangay San Vicente, Panabo City.
Nasayran nga ang nalambigit sa insidente mao ang Toyota Hilux pick-up nga dunay plaka nga LAF 6547 ug gimaneho ni Jullan Clare Vildosola, dalaga, 21-anyos, nga taga Kanari Homes, Barangay New Visayas, Panabo City, ug ang Yamaha Sniper 150 motorcycle nga nagtangag sa plaka nga 853 LJR, gimaneho ni Dominic Apellido, 21-anyos nga taga Purok 21, Barangay San Vicente, Panabo City.
Base sa pagsubay sa awtoridad, nasayran gikan sa mga saksi nga pick-up naglabigar sa direksiyon paingon sa siyudad sa Panabo samtang ang Yamaha Sniper naglabigar sa opposite nga direksiyon.
Apan pag-abot sa Barangay San Vicente, ang Yamaha sniper mipaharurot sa wa matinong gikusgon ang dagan ug pag-abot sa kurbadang bahin, giingong nilahos sa dalan hinungdan nga nibangga sa gikasugat nga pick-up.
Tungod niini, nabalintong ang Yamaha Sniper 150 sa dalan uban ang drayber kinsa nakahiagom og seryusong mga samad sa lawas ug gidali pagdala sa Rivera Hospital sa pamasin nga masalbar pa, apan gideklarang dead on arrival sa nihiling nga doktor.
Gitanggong ang duha ka mga sakyanan nga nalambigit sa insidente sa nataran sa Panabo City Police Station samtang padayon ang gihimong imbestigasyon sa hitabo. (Dexter T. Visitacion)