COTABATO CITY -- Tulo ka tawo ang kompirmado nga nataptan sa kagaw sa mpox (Monkeypox).
Sa taho sa City Health Office, nasayran nga lakip sa nataptan sa maong sakit mao ang 28 anyos nga babaye nga kasamtangang nagpaalim karon.
Samtang usa sab ka 72 anyos nga lalaki ug usa ka kuwatro anyos nga lalaki ang kasamtangang anaa sa home isolation nga gimonitor sa CHO.
Gawas niini, 14 usab ka mga gisuspetsahan nga kaso ang natala sa CHO sa Mother Barangay Poblacion (2), MB Bagua (4), MB Tamontaka (3), Tamontaka Extension (1), Rosary Heights 9 (20, Rosary Heights 1 (1), ug Rosary Heights 10 (1).
Matud sa City Health Office nga ang kasagarang sintomas sa mpox naglakip sa hilanat, sakit sa tutunlan, ubo, paghuot sa ilong, sakit sa lawas, kakapoy, ug labad sa ulo.
Apan ang labing mamatikdan nga timailhan niini mao ang presensiya sa mga butoy-butoy sa nawong, sulod sa baba, kamot, tiil, dughan, kinatawo, ug sampot.
Kalabot niini, giawhag sa CHO ang publiko nga mokonsulta dayon sa labing duol nga barangay health station o motawag sa ilang buhatan kung makasinati sa mga nahisgutang sintomas.
Isip pag-amping, gitambagan usab ang tanan nga mga molupyo nga magsul-ob og taas nga sinina ug maskara sa nawong, manghugas o mag-sanitize kanunay sa ilang mga kamot, likayan ang mga dapit nga daghang tawo, ug mag-amping sa pakighilawas.
Padayon usab nga nanawagan ang mga opisyal sa CHO sa publiko nga mag-alerto ug magtinabangay aron malikayan ang pagkuyanap sa maong sakit sa dakbayan. (Edgar E. Fuerzas)