NAGKAHIMAMAT ang bag-ong acting city director sa Davao City Police Office nga si Police Colonel Mannan Muarip ug Acting Mayor Sebastian Duterte alas 2:30 sa hapon, Lunes, Hulyo 21, 2025 aron tukion ang padayong paningkamot alang sa kahapsay ug kalinaw sa Matina Enclaves, Quimpo Boulevard sa Dakbayan sa Davao.
Sa ilang panagtagbo, si Duterte nagpadayag sa iyang tibuok suporta alang sa mga plano ug programa sa DCPO, ilabi na gyud kadtong nagtumong sa pagpalig-on sa kalinaw ug kahapsay sa siyudad.
Ang pagpadayag og suporta sa mayor maoy usa ka lig-ong pamatuod sa relasyong pagtambayayong tali sa lokal nga panggamhanan sa dakbayan ug sa kapulisan, usa ka mahinungdanon nga panag-uban alang sa pagseguro sa mapadayunon nga kaluwasan, seguridad, ug kaayohan sa tanang Dabawenyos.
Isip tubag, gipadayag sab ni Muarip ang iyang pasalamat ngadto sa pagsalig ug komitment sa mayor ug nagkanayon nga ang maong suporta nagpagahum sa puwersa sa kapulisan sa paghimo sa ilang tahas nga epektibo ug magserbisyo sa katawhan sa Davao City uban ang dedikasyon ug integridad.
“The support of the City Mayor is crucial in realizing our shared vision of a safer and more peaceful Davao. With unity between the local government and the police force, we can truly deliver the kind of service that every Dabawenyo deserves,” matud ni Muarip.
Kahinumdoman nga gikompirma sa DCPO ang pagkatudlo ni Muarip isip maoy bag-ong acting director nga nihulip kang Police Colonel Hansel Marantan, kinsa nabalik ngadto sa Camp Crame alang sa nasudnong mga tahas.
Pormal nga nilingkod si Muarip sa DCPO Headquarters niadtong Hulyo 16, 2025.
Si Muarip nag-alagad kanhi isip hepe sa Salaam Center ilawom sa Directorate for Police Community Relations (DPCR) sa Camp Crame sa Quezon City.
Iyang pagkatudlo niepekto niadtong Hulyo 11, sumala ni DCPO spokesperson Captain Hazel Caballero.
Gilauman nga dad-on ni Muarip uban kaniya ang iyang lig-ong kaalam sa pagpakiglambigit sa komunidad ug "counter-radicalization", gikan sa iyang kasinatian sa trabaho sa Salaam Center, nga nagtutok sa pagpakiglambigit ug pakigtimbayayong uban ang mga komunidad sa Muslim. (WGM, Uban sa taho ni RGP)