NAGPADAYON karon ang Buhangin Police Station sa pag-review sa mga kuha sa closed circuit television (CCTV) camera sa palibot diin ulahing nakita ang babaye nga na-missing sa Buhangin, Davao City.
Sumala ni Davao City Police Office (DCPO) spokesperson Police Captain Hazel Tuazon nga nagpadayon ang Buhangin police sa pagsubay sa mga CCTV aron masubay ang 30-anyos nga na-missing sa lugar kung asa siya ulahing nakit-an.
“So far, atong Buhangin PNP nagpadayon sa pagsubay sa mga kuha sa CCTV sa dapit aron makita nato ang panghitabo labot aning allegedly na-missing,” ingon ni Tuazon sa SuperBalita Davao.
Una niini, pasado alas 10 sa gabii, Disyembre 6, 2024, si Paul Simon Ortiz Go, 35-anyos, logistic officer, ug residente sa Blk 7, Lot 14, Emilia Homes, Barangay Cabantian, Davao City mipatim-aw sa Buhangin police diin misaysay nga wala na kauli ang iyang misis sa ilang balay.
Sa inisyal nga imbestigasyon sa kapulisan, miguwas nga miadto sa usa ka mall sa Lanang ang na-missing kinsa giingong makigkita sa iyang higala mga alas 2 sa hapon, Disyembre 5, 2024.
Saysay sa sketchy report sa DCPO nga pagkahuman ang na-missing gipakanaug sa iyang higala sa tindahan sa Cabantian kay mopalit pa kini og dog food apan hangtud sa pagsulat sa balita kagahapon, ang na-missing wala pa kauli sa ilang balay.
Sa pagkakaron, nagpadayon ang kapulisan sa Buhangin police sa ilang gihimong imbestigasyon labot sa hitabo. (Jeepy P. Compio)