KIDAPAWAN CITY -- Nagpahigayon og relief operation ang Department of Social Welfare and Development (DSWD-12), pinangulohan ni Regional Director Loreto V. Cabaya, Jr. sa pakig-alayon sa lokal nga panggamhanan sa probinsiya sa Cotabato, ubos sa liderato ni Governor Emmylou "Lala" J. TaliƱo-Mendoza, ug ang lokal nga kagamhanan sa Pikit nga gipangulohan ni Mayor Sumulong K. Sultan.
Naghiusang nag-apud-apod kini og hinabang sa 1,876 ka pamilya nga apektado sa pagbaha sa mga barangay sa Takepan, Ginatilan, Calawag, ug Ladtingan.
Isip hinanaling pagtubag sa panginahanglan sa mga biktima, ang matag pamilya gihatagan og usa ka kahon nga family food packs (FFP).
Naa ang presensiya nila 1st District Board Member-elect Rosalie H. Cabaya, uban sa pipila ka mga kawani sa DSWD XII, Provincial Social Welfare and Development Office (PSWDO), ug Provincial Disaster Risk Reduction and Management Office atol sa pag-apud-apod sa mga hinabang.
Kahinumodoman nga niadtong miaging semana grabe nga gibaha ang pipila ka dapit sa lungsod sa Pikit.
Nunot kini sa nagkulismaot nga lakat sa panahon nga niresulta sa kusog nga bunok sa ulan hinungdan sa kalit nga pagbaha. (Edgar E. Fuerzas)