COTABATO CITY -- Pipila ka mga molupyo sa Pagalungan ug Datu Montawal sa Maguindanao del Sur nga naapektuhan sa baha nagpakilimos na sa daplin sa national highway tungod sa kagutom.
Sumala pa nga nihangyo sila nga matabangan aron nga makunhoran ang gibati nilang kagutom.
Giangkon hinuon nila nga nakadawat sila og tabang apan dili pa igo sa ilang inadlaw nga panginahanglan.
Ang ilang mga tanum, kabtangan ug bisan ang mga binuhing hayop apektado sab sa baha.
Kahinumdoman nga moabot na sa 17 ka lungsod sa Maguindanao del Sur ang gibaha gumikan sa walay puas nga pag-ulan nunot sa nagkulismaot nga lakat sa panahon.
Kini naglakip sa Pagalungan, Datu Montawal, Datu Piang, GSKP, Datu Abdullah Sangki, Datu Salibo, Mamasapano, Sultan Sa Barongis, Shariff Saydona Mustapha, Ampatuan, Datu Unsay, Datu Saudi Ampatuan, Shariff Aguak, Rajah Buayan, Datu Anggal Midtimbang, Latlat, ug Pandag kon diin apektado na ang 68,553 ka pamilya.
Kasagaran sa mga nagpalimos kadtong mga temporayo nga namuyo kilid sa national highway nga nagtulda lamang.
Gilauman nga motaas pa pagbalik ang lebel sa tubig-baha gumikan sa low pressure area nga nagdanga-danga sa Mindanao. (Edgar E. Fuerzas)