'Nag-bomb joke', nanghimas rehas

'Nag-bomb joke', nanghimas rehas
DCPO

KANUNAY’NG nagpahinumdom ang awtoridad sa publiko nga dili mohimo’g "bomb joke" gumikan naa kini balaod ug andam nga mosilot.

Sama sa usa ka lalaki nga taga Purok 9, South Bay, Agdao, Davao City, naghimas sa rehas nga bakal sa prisohan human siya nag-"bomb joke".

Inay maglingaw-lingaw sa mall uban ang iyang hinigugma, gikustodiya hinuon sa kapulisan ang lalaki kay nag-"joke" nga naay bomba ang ilang dala nga bag, alas 2:58 sa hapon, adlaw’ng Dominggo, Hunyo 23, 2024.

Usa ka sekyu sa SM Lanang ang ni-report sa kapulisan labot sa hitabo.

Nasayran nga pasulod ang maong lalaki nga giilang si alyas Nelson, uban ang iyang partner, sa entrance sa Supermarket section sa maong mall sa Lanang.

Apan dihang gi-inspeksiyon ang ilang bag nag-"joke" ang lalaki nga may unod kining bomba, butang nga naalarma ang sekyu.

Nanawag og pulis ang sekyu sa Bajada Police Station, diin si alyas Nelson giposasan.

Ang pag-"bomb joke" dunay balaod sa Pilipinas ubos sa Presidential Decree No. 1727 kun Bomb Joke/Threat Law nga dunay silot nga pagkapriso. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph