DEAD on the spot ang usa ka 34-anyos nga construction worker samtang samaran ang iyang live-in partner ug 11 bulan nga anak human gipanigbas gamit ang sundang sa kaugalingong igsuon sa Pandian Compound, Purok 1-B, Baring, Barangay Wangan, Calinan District, Davao City alas 3:36 sa kaadlawon, Hulyo 20, 2025.
Gisugdan og imbestiga sa kapulisan ang insidente human makadawat og 911 distress call ang mobile patrol unit 2639 diin pag-abot sa lugar, nakita ang lawas ni alyas Jing nga wala nay kinabuhi nga naglunang sa kaugalingong dugo sa gawas sa ilang balay, nga puno sa mga samad-tinigbasan.
Ang biktima giila nga si Jay Sato Pandian, 34-anyos, construction worker, samtang ang ka live-in partner niini si alyas Sherly, ug ang ilang anak nga si alyas Flor, 11-bulan, kinsa dunay mga samad-tinigbasan.
Si Sherly napalgan sulod sa ilang kuwarto nga naglisod na og ginhawa, samtang ang bata adunay samad sa tuo nga bukong-bukong.
Ang suspetsado giila nga si June Anthony Sato Pandian, 39-anyos, minyo, laborer, ug igsuon mismo sa napatay.
Sa inisyal nga imbestigasyon, migula nga nag-inom ang suspetsado, asawa sa suspek, ug ang biktima sugod alas 10 sa gabii hangtud nahurot ang ilang ilimnon. Pagbalik sa ilang balay bandang alas 3 sa kaadlawon, natigayon ang mainitong panaglalis gumikan sa giingong selos.
Alegasyon nga ang suspek nasuko gumikan namatikdan niini nga ang iyang asawa giingong dunay gitago nga relasyon ngadto sa igsuon niini nga si Jay.
Tungod sa kahadlok, midagan ang asawa sa suspek dala ang ilang tulo ka mga anak ug nanago sa pinyahan, apan pipila ka gutlo, ang suspek niadto sa balay sa biktima diin samtang mangatulog na unta sila, gipanigbas kini sa suspek nga naigo usab ang gamay nga anak. Gitabangan pa ni Sherly ang bana apan natigbasan gihapon kini sa ulo.
Gidala dayon si Sherly sa Southern Philippines Medical Center samtang ang 11-bulan nga bata gidala sa Isaac T. Robillo Hospital sa Calinan ug gi-report nga luwas na sa peligro.
Ang patay nga lawas ni Jay anaa karon sa Angel Funeral Homes sa Calinan, Davao City.
Giandam na ang kasong murder ug frustrated murder batok sa suspek kinsa gibalhog karon sa prisohan sa Calinan Police Station. (Jeepy P. Compio)