MAG-ILISunta og wire ang barangay kagawad hinungdan nga nisaka kini sa poste. Apan nakuryentihan hinuon ug namatay sa Purok 3, Barangay Siocon, Compostela alas 6:20 sa gabii, Mayo 22, 2024.
Kini maoy nigawas sa gihimong imbestigasyon sa Compostela Municipal Police Station kon diin giila ang biktima nga si Adriano Bigonte Potane, 60-anyos, minyo, giingong accredited electrician, ug taga Purok 7, Barangay Siocon, Compostela.
Gibutyag nga usa ka Rolie Laborada Potane, 39-anyos, minyo, mag-uuma nga molupyo sa Purok 7, Siocon ang nidangop Compostela MPS aron itaho ang kabahin sa insidente sa maong dapit.
Dali matud pa nga nagresponde ang mga pulis sa Compostela MPs ug gidulong ang dapit aron susihon ang giingong insidente.
Base sa imbestigasyon, ang biktima misaka sa poste sa Northern Davao Electric Cooperative, Inc. (NORDECO) aron ilisan ang polyethylene service drop wire nga nakakonekta sa panimalay ni Rovic Jean Galpo. Apan ang biktima nakuryentihan dihang gikonekta niini ang nahisgutang wire sa secondary line nga 220 volts.
Giingong nakaangkon ang biktima og electrical shocked nga niresulta sa iyang kamatayon.
Patay’ng lawas sa biktima gipahiluna na sa Alar Funeral Homes sa Purok 2, Brgy. Poblacion, Compostela. (Dexter T. Visitacion)