Naghantak samtang nagtagay, 1 patay

NISANGKO sa pagpanigbas ang pagduwa og hantak sa tulo ka mga lalaki human kalit lang niulbo ang panaglalis alas 5:13 sa hapon, Agosto 14, 2024, sa Purok Nakasaka, Poblacion Dos, Bansalan, Davao del Sur.

Base sa imbestigasyon nga gihimo sa kapulisan, nasayran nga ang biktima nga si alyas Vic ug suspek nga si alyas Ping, apil na ang usa ka alyas Pano giingong naghantak atubangan sa balay sa biktima ug sa samang higayon nagtagay sa makahubog nga ilimnon.

Samtang nalingaw sa paghantak, kalit lang nahitabo ang init nga panaglalis.

Giingong niuli ang suspek sa ilang balay ug sa dihang nibalik, nagbitbit na kini og mahait nga sundang ug gitigbas ang biktima sa makadaghang higayon tumong sa nagkadaiyang parte sa lawas hinungdan sa kamatayon niini.

Giapil sab og panigbas ni alyas Ping ang iro, manok ug traysikel nga gipanag-iya sa usa ka Junal Estremos.

Daling nisibat ang suspek gikan sa lugar apan nadakpan gihapon sa mga nirespondeng kapuilisan sa Bansalan Municipal Police Station.

Gisulayan pa ang biktima paghatud ngadto sa Davao del Sur Provincial Hospital, Digos City sa mga sakop sa Municipal Disaster Risk Reduction and Management Center (MDRRMC) apan gideklarang patay na kini sa paghidangat.

Narekober sa kapulisan gikan sa crime scene mao ang sundang nga dunay gitas-on nga duha ka tiil ug tres pulgada.

Ang suspek ug ang sundang nga gigamit sa pagpanigbas naa na sa kustodiya sa Bansalan MPS alang tukmang disposasyon sa kaso. (Wenz G. Mendoza)