Nagpabuto'g pusil nabulilyaso, nasikop

GIKUSTODIYA na sa selda sa Laak Municipal Police Station ang usa ka mag-uuma nga gireklamo nga nagpabuto og armas sa Barangay Kaligutan, Laak sa Davao de Oro alas 10:40 sa gabii, Dominggo, Agosto 4, 2024.

Ang suspek giila nga si Bernardo Cabatingan Alonso, 37-anyos, minyo, ug molupyo sa Purok 13, Barangay Kaligutan, Laak.

Subay sa report, nasayran nga usa ka nagpakabanang lungsuranon mitaho sa Laak MPS kabahin sa giingong lalaki nga matud pa nagpabuto’g armas sa maong dapit.

Dali gilayong niresponde ang kapulisan sa nahisgutang dapit ug naaresto ang suspek nga maoy giingong nagpabuto kung diin narekober gikan kaniya ang .357 revolver nga kargado og lima ka mga buhing bala ug usa ka basiyo sa bala.

Gihikay na sa mga pulis sa Laak MPS ang kaso nga posibleng atubangon sa suspek sa korte. (DTV)