Nagpatay sa kaipon, gipangita

Nagpatay sa kaipon, gipangita
(Hulagway gikan Davao City Police Office)

NAGPABILING gawasnon ang lalaki nga midunggab-patay sa iyang kaipon sa Purok 10, Burgunde Street, Barangay Tacunan, Tugbok District, Davao City, alas 8 sa gabii, Hunyo 2, 2024.

Sa report gikan kapulisan, nakadawat sila og tawag gikan sa silingan sa biktima nga si alyas Emily, hamtong ang pangedaron.

Giingong una ang duguong hitabo, ang biktima uban ang mga higala ug kaipon niyang maoy suspek ang nanagtagay.

Mga alas 5:30 sa hapon, sa samang petsa, nakadesider ang biktima ug suspek nga manguli na.

Saysay sa silingan sa biktima nga maoy nitawag og pulis nga mga alas 7:45 sa gabii nakadungog sila og singgit gikan sa usa ka babaye nga nangayo og tabang.

Giadtoan nila ang balay sa biktima ug nakita nila ang suspek nga may giguyod gikan sa ikaduhang andana sa maong balay.

Ang suspek nga nakabantay nga dunay nakakita sa iyang gihimo, daling nisibat ug wa na igkita.

Dihang miabot ang kapulisan, ang biktima nagkadugo nga naghapa sa salog, ug dunay duha ka dinunggaban sa dughan.

Narekober sab gikan sa crime scene ang kitchen knife nga gigamit sa krimen.

Wala gikabutyag sa report sa kapulisan unsay lawom nga hinungdan sa krimen.

Usa ka hot pursuit operation ang gilusad karon sa awtoridad aron madakpan ang suspek. (JPC, RGV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph