DEAD on arrival sa balay tambalanan ang usa ka delivery boy human lubaa samtang nag-repack og ice didto sa Barangay Road sa Purok Mangga, Barangay Santo Nino, Panabo City, partikular sa Bigmac Purified Icetube, alas 8:20 sa buntag, Sabado, Abril 20, 2024.
Biktima giila nga si Miguel Mellijor Coquilla, 21-anyos, ulitawo, ice cube delivery boy nga molupyo sa Purok 11, Barangay Bantacan, New Bataan, Davao De Oro.
Samtang ang gitumbok nga suspek naila nga si Allan Damarillos, 35-anyos, ulitawo nga taga Barangay Matilo, Nabunturan, Davao De Oro.
Matud pa nga samtang ang biktima nagrepack og ice cubes sulod sa Bigmac Purified Icetube, miabot ang suspek og sa kalit lang giluba ang biktima sa makadaghang higayon igo sa nagkadaiyang parte sa lawas.
Ang biktima gisapupo sa kaubanan niini ug gidala sa Rivera Medical Center apan wa na kini matabang pa.
Ang suspek nga daling misibat human mahimo ang krimen giukoy na sa kapulisan aron mapatubag sa salaud nga nahimo. (Dexter T. Visitacion)