GENERAL SANTOS CITY -- Blangko pa ang mga awtoridad sa motibo sa pagpusil patay sa police intelligence alas 6:20 sa gabii, Dominggo, Marso 10, 2024 sa siyudad.
Giila ang biktima nga si Corporal Ricky Gomez, minyo, sakop sa Police Regional Office 12 Intelligence Unit ug nagpuyo sa Carmen, Cotabato Province.
Sumala ni General Santos City Police Office (GSCPO) Director Colonel Nicomedes OLaivar Jr. nga sakay ang biktima sa iyang gimaneho nga motorsiklo sa Diversion Road, Barangay Sinawal sa dakbayan sa GenSan.
Apan kalit lang gipusil sa riding in tandem suspects gamit ang taas nga matang sa armas kinsa abtik sab nga nisibat paingon sa sentro nga bahin sa dakbayan.
Daling gitabang ang biktima sa nagrespondeng mga pulis ug gidala ngadto sa balay tambalanan apan gideklara siyang dead on arrival sa doktor.
Nagtuo ang pamilya ni Gomez nga posible nga pagpatay kaniya dunay kalabutan sa trabaho niini.
Kapulisan sa GSCPO padayon nga nag-imbestigar sa pagpamusil sa biktima. (Edgar E. Fuerzas)