GENERAL SANTOS CITY -- Tumbok na sa mga awtoridad ang suspek nga nagpatay sa massage therapist alas 6:30 sa buntag, Lunes, Hunyo 23, 2025, sa siyudad.
Giila ang biktima nga si Ali Jeyhon Macalintal, miyembro sa LGBTQIA+ ug kanhi sakop sa lokal nga mga tigbalita.
Gibutyag ni General Santos City Police Office (GSCPO) Director Colonel Nicomedes Olaivar Jr. nga pasulod na unta ang biktima sa massage spa sa Calina Street, Brgy. Lagao sa dihang gipusil sa wala mailhing suspek gamit ang kalibre .45 nga pistola.
Abtik sab nga miikyas ang namusil, sakay sa motorsiklo nga gimaneho sa naghuwat niining kauban. Samtang patay gilayon si Macalintal nga naigo sa ulo ug dughan.
Sa wa pa ang pagpamusil, giingong makigkita ang biktima sa usa niya ka acupuncture client sulod sa massage spa nga iyang sideline nga trabaho.
Gikondena sa mga sakop sa mga tigbalita sa dakbayan ang pagpatay sa biktima nga giila nilang buotan ug walay kalaban.
Gipalawman pa sa mga pulis sa GSCPO ang imbestigasyon sa krimen. (Edgar E. Fuerzas)