PATAY ang usa ka lalaki sa dihang aksidente nga nahulog sa gibana-bana nga kapin kun kulang pito ka tiil nga gilawmon sa gihimo nga atabay sa Purok 6-B, Sitio Asang, Barangay Pangyan, Calinan District, Davao City.
Gitaho nga bandang alas 2:30 sa hapon niadtong Mayo 5, 2025, nakadawat ang kapulisan og tawag sa Central 911 nga nagtaho bahin usa ka lalaki nga giilang si Relly Elisan Semblante, 41 anyos, minyo, ug molupyo sa Purok 6-B, Sitio Asang, Barangay Pangyan, nga nahulog sa gihimong atabay sa likod nga bahin sa ilang balay.
Daling niresponde ang kapulisan sakay sa mobile patrol aron nga susihon ang maong taho.
Bandang alas 4:50 sa hapon sa maong adlaw, gitaho sa pulis basi sa saysay sa saksi, nga bandang ala 1:30 sa hapon sa maong adlaw, usa ka lalaki nga giiilang si Junrey Jumawan Villar, 31 anyos, dunay kapuyo, kaabag, ug molupyo sa Purok 2-A, Barangay Bunawan, Davao City, nikanaug sa maong atabay aron nga mosugod na og trabaho.
Apan samtang padulong sa ilawom nga bahin, giingon niining nakatimaho siya og isog ug di maayong baho, hinungdan nga nawad-an matud pa siya og panimuot ug nahulog ngadto sa ilawom.
Tungod niini, giingong daling nikanaug si Semblante sa atabay aron nga luwason si Villar ug nakahimo sa paghigot og pisi sa lawas ni Villar.
Apan si Semblante nawad-an sab og panimuot ug nahulog sa ilawom human nga giingong makatimaho sab sa samang baho.
Ubang mga trabahante nagtinabangay nga birahon ang pisi ug malampuson nga narekober si Villar, apan si Semblante nahabilin sa ilawom sa atabay.
Mga personahe gikan sa Calinan Police Station pangulohan ni Police Major Robel Saavedra, station commander; Central 911 Urban Search and Rescue (USAR) team pangulohan ni Joseph Allawan; ug ang Semsra teams sa Barangay Sirib, Riverside, ug Talomo River nilusad og hiniusang retrieval operation.
Mga bandang 4:15 sa hapon, gideklara sa personahe sa Central 911 nga patay na si Semblante.
Gitakdang ipailawom sa otopsiya ang patay nga lawas ni Semblante ug kasamtangan nga naa sa St. Peter Funeral Homes, Barangay Riverside, Calinan District, Davao City.
Sa pikas bahin, laing usa ka lalaki ang nabangalan nga wa na'y kinabuhi sulod sa lawom nga lungag nga puno og tubig sa Purok Manggahan, Barangay Tambobong, Baguio District, Davao City.
Sumala pa nga alas 11:40 sa buntag kagahapon, Mayo 6, 2025, mga pulis sa Baguio Police Station daling niresponde sa tawag ni Purok Leader Eder Enoc nga nagpahibalo bahin sa tawo nga nahulog sa lungag aron sutaon ug mohimo og imbestigasyon.
Nasayran nga ang patay nga lawas mao si Ernesto Camali Maguan, 56 anyos, ulitawo, mag-uuma, molupyo sa Purok Mahusay, Barangay Tambobong, Baguio District, Davao City.
Sumala pa nga nakit-an ang biktima nga naglutaw sulod sa lawom nga lungag nga puno og tubig ug ang iyang lawas giingong niburot ug baho na.
Gibutyag ni Qurino Ladao Maguan, katapusan niyang nakita ang iyang ig-agaw lima na ka adlaw ang nilabay, ug hubog kaayo. Gituohan nga aksidente siyang nahulog sa lungag nga puno og tubig hinungdan sa iyang kamatayon.
Sa pikas bahin, way nakita ang mga awtoridad nga foul play sa gidangatan sa biktima ug gituohan nga posibleng hinungdan sa kamatayon niini mao ang pagkalumos basi sa nahisgutang mga sirkumstansiya.
Ang patay nga lawas sa biktima gihatud sa Angel Funeral Parlor sa Calinan sa iyang pamilya. (Wenz G. Mendoza)