Nakiglalis relihiyon, liog gigulgol

Nakiglalis relihiyon, liog gigulgol

WALAY relihiyon nga makaluwas kun di ang pagtuo sa Labaw’ng Makagagahum ug ang maayong binuhatan sa tawo sa yuta.

Kini ang matud maoy gipasabot sa biktima ngadto sa suspek nga iyang katagay og ilimnong makahubog ala 1 sa kaadlawon, Mayo 1, 2024, sa Campo 3, Barangay Talomo River, Calinan District, Davao City.

Ang ilang lalis tali sa biktima nga si alyas Michael, 39-anyos, usa ka laborer ug residente sa Purok 1, Barangay Biao, Joaquin Calinan District, ug ang suspek nga si Joselito, 23-anyos, usa ka empleyado sa supermarket ug residente sa Purok 1, Barangay Lacson, Calinan District, miresulta sa brutal nga kamatayon.

Sa pinakaulahing report sa kapulisan, natala sa ilang spot report ang insidente nga gigulgol sa suspek ang liog sa biktima nga misangko sa hinanaling kamatayon niini.

Nasayran nga samtang nakig-inom ang duruha, nagkalalis sila subay sa ilang paghisgot mahitungod sa relihiyon.

Dihang gibutyag na sa biktima ang relihiyon sa suspek ug gipasabot niini ang naunang pamahayag, nainsulto matud pa ang suspek, hinungdan nga mikuha kini'g lagaraw, iyang gitigbas ang biktima.

Wala pa kini nakontento, gigulgol pa niini ang liog sa biktima, kinsa dead on arrival sa ospital.

Hinuon, dali ra sab nga mitahan ang suspek sa Calinan Police Station kinsa pasakaan og kasong murder didto sa korte.

Ang patay nga lawas sa biktima gihaya na ning kasamtangan. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph