Nakuhaa'g armas, bala, shabu priso

BALHOG sa prisohan ang usa ka 26-anyos nga lalaki human nga makuhai og armas ug gituohang ilegal nga druga human gisilbi sa mga awtoridad ang search warrant alas 6:03 sa buntag, Hulyo 4, 2024.

Ang dinakpan nailhan nga si alyas Dennis, way trabaho, molupyo sa Purok TAdena Avellar Compount, Barangay Mankilam, Tagum City.

Nadakpan si alyas Dennis human gisilbi sa kapulisan sa Tagum City Police Station, kauban ang mga personahe sa Davao del Norte Police Intelligence Unit (DNPIU), DNPPO-Special Weapons and Tactics (SWAT) ug Regional Intelligence Unit 11 ang search warrant sa mismo niining pinuy-anan giisyu ni Executive Judge Jimmy B. Boco sa Regional Trial Court 11, Branch 2, Tagum City, Davao del Norte.

Nasakmit gikan sa posisyon sa suspek ang usa (1) ka .45 calibre nga pistola, usa (1) ka magazine sa .45 calibre nga pistola, pito (7) ka buhing bala sa .45 calibre nga pistola, usa (1) ka magazine sa 9mm nga pistola, ug duha (2) ka buhing bala sa 9mm.

Nakuha sab sa mga pulis ang duha (2) ka dagkong pakite sa rectangular shape nga heat-sealed sachet nga dunay sulod nga gituohang shabu, usa (1) ka medium size rectangular shape heat-sealed sachet nga dunay sulod nga shabu, duha (2) ka gamay'ng rectangular shape heat-sealed sachet nga dunay sulod nga shabu, apil na ang usa (1) ka digital nga timbangan kolor itom, usa (1) ka digital timbangan kolor pula ug puti, tulo (3) ka improvised tooter, usa (1) ka lighter kolor green ug daghan pang uban.

Suspek gikustodiya sa prisohan sa Tagum City PNP ug mag-atubang og kasong paglapas sa Republic Act 9165 kun Comprehensive Dangerous Drugs Act of 2002 ug paglapas sa RA 10591 kun Comprehensive Firearms and Ammunition Regulation Act. (Wenz G. Mendoza)