COTABATO CITY -- Pasakaan og kaso nga kalapasan sa Republic Act 9165 o Comprehensive Dangerous Drug Act of 2002 ang usa ka high value target (HVT) nga nadakpan alas 2:00 sa hapon, Huwebes, Marso 13, 2025, sa Datu Odin Sinsuat, Maguindanao del Norte.
Giila ang suspek nga si Montasser Abas Amit alyas Tats, 45-anyos, minyo ug nagpuyo sa Barangay Makir, Datu Odin Sinsuat, Maguindanao del Sur.
Sumala kang Police Regional Office-Bangsamoro Autonomous Region (PRO-BAR) director, Police Brigadier General Romeo Macapaz, nga nagpahigayon og drug buy-bust operation ang hiniusang puwersa sa Sultan Kudarat Municipal Police Station, Datu Odin Sinsuat Municipal Police Station, ug Provincial Drug Enforcement Unit-MagNorte sa Sitio Proper, Barangay Makir, Datu Odin Sinsuat, Maguindanao del Norte batok sa suspek.
Sa dihang gitunol na ni Amit ang shabu ngadto sa PNP undercover agent, dali siyang giposasan.
Nakompiska gikan sa suspek ang tulo ka jumbo size plastic sachet nga dunay sulod nga shabu nga nitimbang og 150 gramos ug nikantidad og P1,020,000.
Nasakmit sab ang usa ka itom ug pula nga 125 Honda Click motorcycle, sling bag, cellphone, paper bag ug buy-bust money.
Balhog karon ang suspek sa prisohan sa kapulisan Datu Odin Sinsuat Municipal Police Station samtng nagpaabot sa kasong iyang atubangon. (Edgar E. Fuerzas)