Nakuryente, naluwas

NALUWAS ug nagpaalim sud sa ospital ang usa ka 22-anyos nga ulitawo human nga mikatkat sa poste sa kuryente alas 11:30 sa buntag, Martes, Mayo 20, 2025 sa Dumalag I, Matina Aplaya, Davao City.

Usa ka alyas Marlon ang nasampit nga ulitawo kinsa nakita nga nagbitay na lang sa taas sa poste nga nasangit sa mga live wire.

Nakaangkon og mga paso sa lawas ang biktima kinsa naluwas sab dayon sa miresponde nga mga rescuers gikan sa Central 911 Emergency Rescue Team.

Gisaysay sa inahan sa biktima nga nagsugod niadtong miaging tuig nga magul-anon ang iyang anak dihang namatay ang higala niini nga babaye nga si alyas Baby Duck.

Gikan sa pagkamatay sa higala, masulob-on na ang nasampit nga ulitawo ug hangtud nga wala niini nakaya ang gihambin nga pagsubo.

Dugang pa nga usahay nakaingon ang inahan nga nalisoan na gikan sa maayong pangisip ang nahisgutang ulitawo ug malipay na lang sila makakita nga nakatulog kini.

Apan kung nagmata, luoy suma pa kaayong tan-awon gumikan makita sa panagway ang tumang kaguol ug usahay mag-alingasa.

Kagahapon nakurat na lang ang mga silingan dihang nakita nila nga nagbitay ibabaw sa poste ang ulitawo.

Ang nasampit nga batan-on anaa karon sa Southern Philippines Medical Center (SPMC).

Kung duna kamo'y mga gihambin sa galamhan ug nanginahanglan kamo og tawo nga maistoryahan sa inyong gidala nga kasubo, ug uban pang mga mental health crisis, puwede kamo nga motawag sa National Center for Mental Health, 0917-899-8727 (USAP), 7989-8727 (USAP) naa sab ang Hopeline, 0917-558-4673; 0918-873-4673; 8804-4673 2919 (toll-free for Globe and TM) ug mamahimo usab nga mokontak sa Philippine Mental Health Association (PMHA) Davao Chapter. (Jeepy P. Compio)