DI MOUBOS sa 70 ka mga tawo lakip na kabataan ang giatiman sa Rural Health Unit sa South Upi sa Maguindanao del Sur human makasinati ug pagnakit sa tiyan, kalipong ug pagsukasuka mga alas tres sa hapon, Abril 25.
Ang mga biktima nga gikan sa Barangay Pandan ug Barangay Kigan sa South Upi mitambong og tribal wedding, apan sa kalit lang nakasinati sa mga simtomas sa food poisoning.
Suma pa nga nagluto og benito o lumad nga manok nga giluto sa gata sa lubi ang gisilbi sa seremonya.
Suma pa nga nalingaw pa pag-ayo ang mga bisita sa ilang gikaon nga hikay, apan sa kalit lang mikalit og kayam-id ang ilang nawong sa panakit sa tiyan ug pagsukasuka.
Sa 57 ka mga pasyente, diin way apil ang direktang gikonsulta sa SUMH ug Datu Blah Hospital nga nakita ug na-evaluate sa BHS Pandan, 25 kanila ang gidala sa South Upi Municipal Hospital alang sa dugang ebalwasyon.
Daling niresponde ang buhatan ni Mayor Reynalbert O. Insular pinaagi sa pagpadala og mga rescue ambulance ug transport vehicles, pagtunol og tambal.
Gisubay pa sab sa Ministry of Health sa Bangsamoro Autonomous Region in Muslim Mindanao kung ang pagkaon nila sa Benito maoy rason sa pagkasakit sa mga mitambong sa kumbira. (Edgardo E. Fuerzas)