Nalatayan sa gidrayban nga truck

Nalatayan sa gidrayban nga truck
Hulagway gikan sa Davao City Police Office

NAPISAT ug namatay ang drayber human nga nalatayan sa ligid sa iya mismong gimaneho nga prime mover truck alas 8:34 sa gabii, Huwebes, Hulyo 4, 2024, sa Daang Maharlika National Highway, Km. 12, Sasa, Davao City.

Sumala pa nga nihimo og imbestigasyon ang Sasa Police Station pinaagi ni PCpl Rhedz Reigie Abao, duty traffic investigator human gipahibawo sa Central 911 nga dunay nahitabong aksidente sa nahisgutang dapit partikular sa atubangan sa Kudos Trucking Corportation sa dapit.

Sa inisyal nga imbestigasyon, nasayran nga ang hitabo naglambigit sa usa ka prime mover truck nga dunay plate no. AAZ 4213 nga gipanag-iya sa Cargo Transport Corp., gimaneho ni Jerson Almero Ariston, 48, minyo ug molupyo sa Purok 13, Tibungco, Davao City.

Sumala pa nga ang prime mover naglabigar gikan sa Kudos Trucking Corp. nga milusot na sa Daang Maharlika National Highway padulong sa habagatang bahin sa lugar.

Sa dihang niabot na sa kanto sa dalang Km 12, Sasa, nikalit lang og hunong ang prime mover. Ug subay sa pahayag ni Michael Medecelo Belotendes, duty guard sa Kudos Trucking Corp., iyang nakita ang usa ka lalaki nga naghigda duol sa luyong bahin nga ligid sa maong prime mover truck. Human niini, nakita sa sekyu nga ang trak nikalit lang og sibog ug naligsan ang lalaki nga mao ang drayber nga si Ariston.

Daling gitabang si Ariston sa nirespondeng mga sakop sa Barangay Disaster Risk Reduction and Management Center sa Sasa apan giingong wa nay kinabuhi ang biktima.

Usa ka Raul Chua, kaubang drayber sa biktima, nagsusi ug nasayran nga ang brake hose sa prime mover natanggal ug gituohang wala mopaak sa dihang nisibog ang trak.

Gikompirma sab ni Chua nga ang nagmaneho sa trak mao si Ariston ug wala kini kauban nga helper.

Ang asawa pud mismo sa biktima nga si Maridith Sibayan nag-ila sa biktima nga iyang bana ug maoy nagdrayb sa prime mover truck.

Patay nga lawas sa biktima gidala ngadto sa Rivera Funeral Homes sa maong dapit. (Wenz G. Mendoza)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph