Naligo sa sapa, gianod sa baha

PATAY na nga nakaplagan ang babaye nga gianod sa baha alas 8:00 sa buntag, Dominggo, Enero 26, 2025, sa Alamada, probinsiya sa Cotabato.

Giila ang biktima nga si Marites Balila, 42-anyos, dalaga, ug nagpuyo sa Sitio Harab, Barangay Barangiran, Alamada.

Sumala kang Cotabato Police Provincial Office (CPPO) Director, Police Colonel Gilberto Tuzon, nga naligo matud pa ang biktima sa Libungan River sa Tabarno Section, Barangay Mirasol, Alamada dungan sa makusog nga ulan.

Apan kalit lang mibuhagay ang kusog nga bul-og sa tubig sa sapa ug gianod si Balila.

Gisulayan pa og luwas sa iyang mga kauban ang biktima apan gianod kini paingon sa lawom nga bahin sa sapa.

Nagtinabangay ang mga sibilyan ug mga sakop sa rescue team sa Municipal Disaster Risk Reduction and Management Office (MDRRMO-Alamada) sa pagpangita sa dalaga apan tulo pa ka oras ang milabay una napalgan ang iyang patay nga lawas.

Nagpasidaan ang MDRRMO-Alamada nga mag-amping gyud kung maligo sa sapa ilabi na nga lawom ang tubig tungod sa baha. (Edgar E. Fuerzas)