Namaligya og 2 bitin nadakpan

KASONG paglapas sa Wildlife Resources Conservation and Protection Act ang atubangon sa suspek kinsa nadakpan nga namaligya og bitin alas 2 p.m. niadtong Martes, Agosto 6, 2024 sa General Santos City.

Nadakpan ang wildlife trafficker sa gilusad nga entrapment operation sa Community Environment and Natural Resources Office (CENRO) ug sa Philippine National Police Maritime 12.

Giila sa Department of Environment and Natural Resources 12 nga gipangulohan ni Regional Executive Director Felix Alicer, ang suspek nga si Kyle Japitan, 23-anyos kinsa nakorner sa mga awtoridad sa Barangay Calumpang sa dakbayan.

Wala masayud ang suspek nga ang iyang gibaligyaan og 2 ka Burmese python mga nagpakaaron-ingnon lang nga mamalitay apan mga pulis diay.

Sumala pa nga giangkon sa suspek nga gipalit sab niya ang maong mga bitin pinaagi sa online nga tag P2,500 matag usa ug gipadala kini sa usa ka iladong courier.

Gawas sa 2 ka Burmese python, nasakmit usab sa mga awtoridad ang P7,500 nga buy-bust money ug cellphone gikan sa suspek.

Ang Burmese python naa sa listahan isip usa sa mga vulnerable species sa International Union for Conservation of Nature (IUCN). (EEF)