'Namarang,' gi-ambush

PATAY ang usa ka amahan dihang giatngan ug gi-ambush sa duha ka mga suspek ala 1 sa hapon niadtong Huwebes, Agosto 22, 2024, sa Barangay Taocanga, Manay, Davao Oriental.

Nasayran nga nitaho ngadto sa mga sakop sa Revitalized-Pulis Sa Barangay (RPSB) si Kagawad Lemuel Langdanganon bahin sa nahitabong pagpamusil sa nahisgutang dapit.

Nakigkoordinar gilayon ang RPSB ngadto sa Manay Municipal Police Station ug daling nagpadala og imbestigador aron susihon ang maong hitabo.

Sa pasiunang imbestigasyon, nasayran nga alas 6 sa buntag sa maong adlaw, ang biktima nga si alyas Ben, naglakaw uban ang iyang anak lalaki padulong sa ilang kamaisan, mga usa ka kilometro gikan sa ilang balay. Apan kalit lang gibanhigan sa mga suspek nga sumala pa gipang-ila lang nga sila alyas Toto ug alyas Setol gamit ang homemade shotgun o "bukakang" hinungdan sa kamatayon sa biktima kinsa nakahiagom og walo ka mga samad sa likod nga bahin sa lawas kon diin usa niini nilahos sa dughan.

Mga awtoridad walay nakaplagan nga mga basiyo sa bala sa crime scene.

Base sa paghinabi sa kapuyo sa biktima nga mga suspek nag-akusar sa iyang bana nga namarang o nagkulam ngadto sa ilang igsuong lalaki.

Hinuon ang kapuyo sa biktima, uban sa ilang mga paryente, nibalibad na nga dad-on ang patay nga lawas niini sa balay tambalanan.

Nibalibad sab ang iyang kapuyo nga ipailawom sa otopsiya ang patay nga lawas sa bana bisan kung gihanyagan sa nirespondeng team sa awtoridad nga abagan sila sa transportasyon ug galastuhan. Gani nipirma pa ang kapuyo og "waiver" aron nga way mahitabong otopsiya sa patay nga lawas sa iyang bana.

Mga sakop sa RPSB, pangulohan ni PMSg Richard Daleon, naglusad na og hot pursuit operation batok sa gitumbok nga mga suspek sa Barangay Taocanga, Manay, Davao Oriental. (Wenz G. Mendoza)