GIASIKASO na sa usa ka construction company ang pagpalubong sa namatay nga usa ka steel man ug ang galastuhon sa ospital sa laing duha nga naangol sa pagkahugno sa column bridge pier 5 sa construction site sa Malagamot, Panacan, Davao City, Lunes sa hapon, Hunyo 17, 2024.
Sa inisyal nga report gikan sa Davao City Police Office (DCPO), nasayran nga usa ka JP Villanueva Oftana, 19-anyos, taga Malita, Davao Occidental ang namatay samtang mga angol gipang-ila nga sila Ian Jarol, 25-anyos, ug Rogelio Roxas, 28-anyos, kinsa pulos sab mga steel man.
Dugang impormasyon nasayran nga nisaysay ang foreman nga si Christopher Ebao nga iyang nakita ang column bridge 3 pier 5 nga gi-construct nga kalit lang nahugno mga alas 3:15 sa hapon niadtong Lunes.
Dali dayon nga gitabang ang mga nahisgutan diin ang biktima nga si Oftana naipit sa mga bakal samtang ang duha naipit sab hinungdan nga dali silang gipangdala sa ospital.
Ang nahugno nga column bridge giingong usa ka proyekto sa Department of Public Works and Highways apan wala pa kini kompirmasyon sa maong ahensiya.
Padayon ang gihimong imbestigasyon sa kapulisan sa Sasa Police Station kalabot sa hitabo. (Jeepy P. Compio)